Historia
Manuel Gago, a historia dos símbolos empregados polos irmandiños na revolta e a interpretación contemporánea

A Revolta Irmandiña non foi só un levantamento popular armado contra a nobreza, senón que tamén foi un movemento cargado de símbolos, linguaxes e xestos políticos aos que apenas se lle pon o foco dende o presente. No cuarto capítulo de Verdades e mentiras da Revolta Irmandiña, o investigador e divulgador Manuel Gago afonda na historia dos símbolos empregados polos irmandiños para expresar poder, xustiza e ruptura coa orde establecida.

Escritor e xornalista e unha das voces máis recoñecidas da divulgación histórica en Galiza, Gago analiza na conversa con Javier H. Rodríguez como a destrución dos castelos e a simboloxía funcionaron como ferramentas do que hoxe entenderiamos como comunicación política nunha sociedade maioritariamente oral.

Un capítulo no que Gago tamén convida a reflexionar as lecturas políticas e socias que se fixeron a finais do século pasado e máis do actual dos feitos para dotalo de certo relato de país.

Verdades e mentiras da Revolta Irmandiña é o título que abarca unha narrativa transmedia que conta con dúas canles principais: a audiovisual, enfocado ás redes, e o podcast. Producido por O Salto, CRU e máis Descifrando a Historia, poderás atopar pílulas en vídeo nas redes que funcionan a modo de verificadores de feitos dalgunhas das ideas máis estendidas sobre este episodio no imaxinario popular. 

Verdades e mentiras da Revolta Irmandiña está financiado con recursos públicos grazas ao certame Fondo de proxectos culturais Reino de Galicia, promovido pola Deputación da Coruña.