LGTBIAQ+
Unha mobilización percorrerá Compostela este domingo en defensa dos dereitos das persoas trans

Diversos colectivos sociais e organizacións convocan para este domingo unha manifestación nacional en Galiza co obxectivo de reivindicar os dereitos das persoas trans e denunciar a situación de vulnerabilidade que continúa a afectar a este colectivo.

Entre as principais preocupacións sinaladas polos organizadores atópase a realidade das persoas trans migrantes, moitas das cales chegaron fuxindo de países autoritarios e transfóbicos. Segundo denuncian, ao chegar a Galiza enfróntanse a numerosos impedimentos burocráticos que dificultan o recoñecemento do seu nome e identidade de xénero, deixándoas nunha situación de desprotección.

Tamén poñen o foco nas infancias trans menores de 12 anos, cuxo recoñecemento reclaman no marco da Lei Trans de 2023. A maiores, destacan a falta de recoñecemento legal das persoas non binarias, que continúan atopando obstáculos tanto para o cambio de nome como para acceder a tratamentos médicos adecuados.

A mobilización tamén quere amosar a súa solidariedade coas persoas trans en Portugal, onde, segundo denuncian, se está a producir un retroceso nos dereitos do colectivo, con medidas como a prohibición dos bloqueadores hormonais en menores de 18 anos ou a re-patoloxización das identidades trans. Estes discursos, aseguran, gardan similitudes cos promovidos pola dereita e a extrema dereita no Estado español.

Os convocantes fan un chamamento á sociedade galega para participar na protesta, subliñando que “a loita trans é a loita de todas”. A manifestación conta xa co apoio dun manifesto subscrito por máis de 120 organizacións, entre colectivos sociais, sindicais, veciñais, políticos e culturais.

Entre os obxectivos da mobilización está aumentar a conciencia social sobre a diversidade de xénero e contribuír á redución de casos de acoso, violencia e agresións, como a rexistrada recentemente en León. Ademais, pretenden visibilizar as vivencias do colectivo e poñer en valor a súa loita.

Os organizadores denuncian tamén o que consideran un incumprimento das demandas históricas por parte dos gobernos galego e estatal. Entre as súas reivindicacións inclúense a protección legal efectiva das persoas trans, o acceso digno á sanidade, educación e emprego, o freo ás políticas transfóbicas, a regulación contra os discursos de odio, a adaptación do protocolo educativo galego á Lei Trans de 2023 e a formación obrigatoria en identidade de xénero para profesionais da educación e da saúde.

Así mesmo, reclaman programas de refuxio para persoas trans perseguidas nos seus países de orixe, campañas de educación masiva para combater a desinformación e o recoñecemento legal das persoas non binarias e das persoas trans menores de 12 anos, así como medidas específicas para garantir a protección das persoas trans migrantes e racializadas.

Desde a organización conclúen cunha mensaxe clara: “Os dereitos trans son dereitos humanos, e a nosa existencia non é un debate nin unha ideoloxía, senón unha realidade”.