Libertad de prensa
Abel Caballero recibe un toque de atención do CPXG por limitar a liberdade de prensa e o dereito a informar

O Colexio Profesional de Xornalistas de Galicia (CPXG) reprendeu a Abel Caballero por estar desenvolvendo prácticas desde a alcaldía de Vigo que “constitúen unha gravísima limitación á liberdade de prensa e ao dereito a informar”.

Na carta remitida ao alcalde vigués polo decano do CPXG, Francisco X. González Sarria, trasládanselle as queixas que teñen manifestado diferentes xornalistas de medios de comunicación críticos coa xestión municipal, entre eles Javier H. Rodríguez, redactor de O Salto Galiza, que nos últimos meses publicou exclusivas incómodas para Caballero, como a presunta simulación dun concurso público de 1,9 millóns de euros para pagar un concerto xa acordado coa banda Guns N'Roses.

O maltrato institucional contra determinadas informadoras quedou evidenciado publicamente a semana pasada, cando Javier H. Rodríguez aproveitou a rolda de prensa de Caballero para preguntarlle sobre a presunta conivencia entre o Concello de Vigo e a promotora Live Nation no caso do concerto de Guns N'Roses do pasado 12 de xuño. Ademais de non responder, o alcalde socialista retiroulle a palabra ao xornalista con formas autoritarias que deixaban ver un talante político non tan visibilizado na esfera pública. Este momento de tensión foi documentado e compartido nas redes sociais.