Medio ambiente
O PSdeG cambia de posición e chama á súa militancia para acudir á manifestación contra Altri na Pobra

Logo de meses de presión social e respostas ambiguas pola súa banda, o PSdeG-PSOE de José Ramón Gómez Besteiro pegou un cambio de rumbo na súa posición sobre a macrocelulosa que Altri, Greenalia e a Xunta queren instalar no centro xeográfico de Galiza. Nunha carta enviada por mail, o PSOE galego chama á súa militancia para acudir este sábado á manifestación contra a celulosa que foi convocada na Pobra do Caramiñal pola Plataforma en Defensa da Ría de Arousa e Ulloa Viva.
“Como seguro xa sabedes, o pasado venres deuse a coñecer a Declaración de Impacto Ambiental positiva por parte da Xunta de Galicia ao proxecto de celulosa impulsado pola empresa Altri en Palas de Rei.”, comeza a carta. E segue: “Dende o PSdeG consideramos que este proxecto non encaixa nin dende o punto de vista medioambiental nin económico e tampouco como proxecto estratéxico para Galicia.”. Fontes do partido críticas coa posición da dirección, recoñecen en privado que “xa era hora de que o partido comezase a tomar posicións fortes”.
Con todo, a breve carta, non está exenta de contradicións: “As e os socialistas galegos fomos os primeiros en manifestar publicamente a nosa dúbida respecto a concesión de fondos públicos a esta iniciativa e expresamos claramente que non debería recibir axudas extraordinarias.”, presupón a carta, mentres que a hemeroteca desfai rapidamente esa afirmación.
“Este proxecto debe ser analizado non só dende o punto de vista medioambiental, senón tamén en termos económicos e sociais, avaliando o seu verdadeiro impacto na creación de emprego e na economía galega. Por todo isto, queremos animarvos a participar na mobilización convocada polas plataformas cidadás que se levará a cabo o vindeiro sábado na Pobra do Caramiñal”, remata a misiva dirixida ás súas bases.
Relacionadas
Para comentar en este artículo tienes que estar registrado. Si ya tienes una cuenta, inicia sesión. Si todavía no la tienes, puedes crear una aquí en dos minutos sin coste ni números de cuenta.
Si eres socio/a puedes comentar sin moderación previa y valorar comentarios. El resto de comentarios son moderados y aprobados por la Redacción de El Salto. Para comentar sin moderación, ¡suscríbete!