Partido Popular
A empresa da irmá de Feijóo levou 1,6 millóns da Xunta en 124 contratos a dedo desde xaneiro

Eulen, a empresa que a irmá de Alberto Núñez Feijóo dirixe en Galiza, asinou 124 contratos menores con organismos dependentes da Xunta só no que vai de ano. A suma total é de exactamente 1.598.835,23 euros se se teñen en conta as licitacións adxudicadas a dedo desde o un de xaneiro até a segunda quincena do mes de setembro deste ano. A rede empresarial que Micaela Núñez Feijóo lidera no noroeste do Estado español segue facendo caixa malia que as sospeitas sobre un presunto trato de favor desde o Goberno galego —primeiro do seu irmán e despois do actual presidente, Alfono Rueda— noutras 1.311 facturas entre 2018 e 2023 forzaron a que probablemente sexa a única comisión de investigación de toda a lexislatura en Galiza.

O BNG forza unha comisión para investigar miles de contratos a dedo da Xunta con empresas afíns ao PP

Javier H. Rodríguez

Política

Política O BNG forza unha comisión para investigar miles de contratos a dedo da Xunta con empresas afíns ao PP

Javier H. Rodríguez

Os 25 deputados nacionalistas usarán a súa única oportunidade de facelo de maneira unilateral para investigar as miles de licitacións sospeitosas destapadas polo Salto e Público, o sobrecusto do hospital de Vigo e as contratacións con Eulen.

Redes clientelares Así evita os concursos da Xunta a empresa da irmá de Feijóo: cinco millóns en 1.311 facturas

A maneira de actuar desde os despachos da Xunta de Galiza segue sendo a mesma que desde o 2018: fraccionar servizos que se poderían licitar conxuntamente e así evitar sacalos a concurso, sorteando á competencia e, quizais, pagando un prezo por enriba do de mercado. De feito, estes son algúns dos argumentos —e das sospeitas— que levaron ao Bloque Nacionalista Galego (BNG) a utilizar a súa única oportunidade de forzar unilateralmente unha comisión de investigación no Parlamento de Galiza. Alí haberán de sentar o agora presidente do Partido Popular e o actual presidente da Xunta para explicar tanto os case 1.500 contratos repartidos indiscriminadamente desde a Administración galega, como os sobrecustos de 470 millóns de euros do Hospital Álvaro Cunqueiro (Vigo) e os contratos de emerxencia asinados durante a última etapa de Feijóo como presidente, coincidindo coa etapa máis dura da pandemia de coronavirus. Aínda que o Partido Popular podería retorcer a súa maioría absoluta para tratar de librar a Feijóo deses focos.

Esta información publícaa en exclusiva O Salto grazas á análise exhaustiva de preto de dous millóns de contratos emitidos sen anuncio previo nin concurso público polas decenas de organismos públicos dependentes da Xunta de Galiza, malia a escasa accesibilidade que ofrece o Portal de Transparencia do Goberno galego neste tipo de licitacións. Ademais destas contratacións, a empresa da que Micaela Núñez Feijóo é alta directiva levou nas mesmas datas outros 15,1 millóns en licitacións maiores, esta vez si abertas, como desvelou o diario Público en 2022 e sobre as que pesa un presunto manexo de información privilexiada.

Contratos menores de la Xun... by El Salto periódico

Todas estas facturas, que sumadas exceden o seis millóns de euros, foron conseguidas grazas a todos os organismos dependentes do Goberno galego, que contrataron de forma recorrente con familiares de altos cargos do partido, como consellerías, axencias públicas, consorcios, organismos autónomos, fundacións do sector público, sociedades mercantís públicas e outros entes como institutos sectoriais ou centros de innovación. Todos eles, elixiron e seguen elixindo contratar con Eulen, Eulen Centro Especial de Emprego, Eulen Seguridade e Eulen Servizos Sociosanitarios, empresas pertencentes ao mesmo grupo.

Micaela Núñez Feijóo, irmá menor do presidente do PP foi ascendida en 2016 ao cargo de directora de Eulen para o Noroeste do Estado español, antes ocupara o de directora rexional para Galiza. Durante o ano anterior, a empresa que agora dirixe obtivo o seu récord de adxudicacións da Xunta até entón: 6,2 millóns de euros de diñeiro público. As cantidades adxudicadas ao entramado empresarial de Eulen desde maio do 2009, cando Núñez Feijóo accedeu ao poder supoñen unha media anual de 2,86 millóns. Con todo, na lexislatura comprendida entre os anos 2005 e 2009, cun goberno de coalición do PSdeG e o BNG, Eulen obtivo 3,96 millóns. É dicir, unha media de 793.000 euros por ano.