O Salto Galiza
En agosto e setembro recibirás unha edición única

Seguramente te preguntarás por que acabas de recibir esta edición de El Salto en troques da túa edición galega habitual. Desde o colectivo editor do proxecto decidimos unificar todas as edicións territoriais nunha soa edición en agosto e setembro.

Este cambio responde a dous motivos fundamentais. O primeiro que, como xa saberás, a nosa situación económica pasa por momentos difíciles. O outro motivo é que estamos reformulando o modelo do noso proxecto de comunicación, e queremos que decidas con nós o seu futuro. Nestes tres anos que levamos en funcionamento, superamos, mes a mes, os nosos récords de visitas na web. Porén, os ingresos e o número de subscritores foron diminuíndo.

Cremos que é momento de reflexionar sobre como podemos ser máis útiles, e do que si que estamos bastante seguros é de que isto pasa por destinar máis recursos á web, o que tamén nos axudaría a facer máis contidos en galego, algo que tentamos mellorar cada día e para o que precisamos máis apoios.

Para reducir gastos estamos estudando varios posibles cambios na revista en papel, que a día de hoxe consta de seis edicións territoriais e supón unha gran porción dos gastos. Unha destas posibilidades é unificar nunha soa edición as seis edicións territoriais actuais. Outra sería ampliar a súa periodicidade.

A decisión será das persoas subscritas, e por iso queremos que antes teñas nas túas mans un exemplo do que podería ser, e así poder decidir o futuro da revista impresa.

Ademais, en agosto O Salto Galiza reducirá o volume de publicacións. As persoas do nodo galego precisamos unhas semanas de descanso. Á volta do verán volveremos con máis forza e poñeremos en marcha un referendo ás nosas socias no que poderás decidir que queres que sexa O Salto.