Activismos
Guerra xeopolítica e loitas sociais: un ciclo de conferencias aborda en Vigo as raíces dun mundo en crise

Nun contexto de crecente inestabilidade, o mundo atópase atrapado nunha rede de tensións xeopolíticas que poñen en risco a seguridade e os dereitos fundamentais de millóns de persoas. Os conflitos armados, os episodios de violencia extrema, os procesos de colonización contemporánea e as disputas de poder entre bloques internacionais están a redefinir o equilibrio global nun escenario cada vez máis fracturado.

As grandes potencias continúan a exercer a súa influencia a través de estratexias que inclúen alianzas militares, sancións económicas, campañas de desinformación e mecanismos de represión. Mentres tanto, as organizacións internacionais, creadas para garantir a estabilidade e a paz, vense paralizadas pola influencia dos propios actores que perpetúan estas situacións de conflito. As consecuencias desta realidade tradúcense en milleiros de vidas truncadas, desprazamentos masivos e sociedades enteiras sometidas á incerteza, a pobreza e a vulnerabilidade extrema.

Neste escenario, xorde unha pregunta ineludible: que papel pode xogar a cidadanía global e as organizacións da sociedade civil para frear esta escalada de violencia e garantir a protección dos dereitos humanos e do medio ambiente? A resposta non é sinxela, mais apunta cara á necesidade urxente de reforzar os lazos de solidariedade internacional, impulsar redes de apoio mutuo e reivindicar mecanismos de mediación que prioricen a vida das persoas por riba dos intereses estratéxicos e económicos.

Con esta perspectiva, celebrarase un novo ciclo de xornadas baixo o lema Mundo en crise: guerra xeopolítica e loitas sociais, un foro de análise e reflexión que busca afondar no estudo das dinámicas actuais do poder global, examinando os conflitos en curso e as súa orixes políticas e económicas. Trátase dunhas xornadas que discorrerán en Vigo, entre o 19 e o 22 de marzo de 2025. Achegaranse olladas diversas mediante a realización de distintas palestras para analizar a presente situación dos diferentes poderes fácticos e como combatelos. Ademais, pretende xerar un espazo de debate e conciencia cidadá, promovendo o papel activo da sociedade na loita pola paz e a xustiza internacional, ao tempo que explora alternativas, estratexias e ferramentas que permitan construír sociedades máis equitativas e sostibles, desde o local ata o global.

As xornadas contarán coa participación de destacados poñentes que abordarán cuestións clave para comprender a complexidade do contexto actual. O economista e referente político galego Xosé Manuel Beiras analizará a decadencia do Estado do benestar e o poder transnacional na era das empresas transnacionais. O activista palestino Fayez Badawi exporá a situación da resistencia palestina e a necesidade dunha solidariedade internacional efectiva nun contexto de xenocidio. O eurodeputado e activista Miguel Urbán tratará o avance da extrema dereita global e as súas consecuencias para a gobernanza internacional. A xornalista Aurora Moreno Alcojor analizará a emerxencia climática e o impacto das cadeas de produción global nos dereitos humanos, mentres que Queralt Castillo Cerezuela afondará nos desprazamentos forzados por razóns climáticas e a falta de recoñecemento legal das persoas refuxiadas climáticas. O xornalista arxentino Eduardo Giordano explicará o saqueo dos recursos naturais e o papel do imperialismo en América Latina e Europa. Pola súa parte, Manu Levin tratará a influencia dos medios de comunicación na xeopolítica e na construción da opinión pública global, e Alberto Quian Pampín abordará o papel da tecnoloxía e da cultura hacker como ferramentas para a loita social.

Nun momento no que a historia se escribe a un ritmo acelerado e os equilibrios internacionais se ven ameazados por unha escalada constante de tensións, estas xornadas representan unha oportunidade para comprender o presente e procurar saídas colectivas cara a un futuro máis xusto e solidario.