Opinión
ASalta: construír un xornalismo no que collamos todas

Que é ASalta?
ASalta é un espazo feminista que nace dentro de O Salto Galiza para acoller xornalismo transversal de calidade. Procuramos ser unha sección diversa e inclusiva, que priorice fontes non hexemónicas, que fomente o pensamento crítico e a creación de vínculos. Un espazo de información horizontal e colectivo. 

Por que xorde?
O nacemento desta sección deixa en evidencia a carencia e a necesidade dun xornalismo no que a perspectiva de xénero atravese todos os contidos e non só as temáticas feminizadas. 

Ante esta insuficiencia, un grupo de mulleres decidimos xuntarnos para reivindicar e promover un xornalismo con perspectiva feminista e transversal. Consideramos que é imprescindible levar ás persoas que están na marxe ao centro da vida para romper estigmas, creando un espazo onde as identidades non hexemónicas poidan ter voz, axudando á creación de comunidades inclusivas e plurais.

Quen pode participar?
Calquera persoa que comparta estes valores pode propoñer ideas. En Asalta queremos incluir ás voces que xeralmente non están representadas nos medios de comunicación.

Polo tanto, pretendemos ser un espazo de traballo seguro, no que as mulleres que creamos contido poidamos debatir, aprender e apoiarnos mutuamente. 

Cal é o obxectivo?
Queremos ir alén do 8M e apostar por un xornalismo inclusivo, feminista e no que teñan cabida voces diversas.