We can't find the internet
Attempting to reconnect
Something went wrong!
Hang in there while we get back on track
Casas de apuestas
BNG denuncia en Europa a proliferación de casas de apostas en Galiza
Reclama unha regulación a nivel europeo para a protección dos consumidores, en especial dos menores e outros consumidores vulnerables
![detalle campaña unión anarcosindicalista coruña casas apuestas](/uploads/fotos/r2000/3aa12edd/IMG_0457_ok.jpg?v=63705381973)
A eurodeputada do BNG, Ana Miranda, presentou unha pregunta dirixida á Comisión Europea sobre o aumento de máquinas e casas de apostas en Galiza, especialmente en barrios populares e cun gran impacto entre menores de 30 anos. “Xa non hai barrio galego sen casas de apostas, moitas zonas afectadas pola crise económica, co que cómpre poñer en marcha un maior control sobre as apostas, porque supoñen un grave prexuízo para a mocidade, ao potenciar o xogo compulsivo e o incremento dos casos de adicción pois as persoas mozas son os consumidores máis vulnerables”, salienta.
Ao fío desta situación, na iniciativa presentada, a eurodeputada nacionalista diríxese á Comisión Europea e sinala que debía lembrarlle ao Estado que cumpra a Recomendación da Comisión de 2014 para protección dos consumidores e usuarios de servizos de xogos en liña e a prevención do xogo entre os menores. Ana Miranda reclama unha regulación a nivel europeo para a protección dos consumidores, especialmente dos menores e outros consumidores vulnerables, que regule estes locais e que inste aos Estados Membros a poñer en marcha campañas de información sobre os perigos destas actividades.
Neste sentido Miranda denuncia o aumento da publicidade televisiva referida a estas actividades empregando como reclamo a personalidades con prestixio social mentres, pola contra, non existen campañas de prevención dos efectos do xogo, de xeito que non se cumpre a normativa de regulación da publicidade.
Sector del juego
Xogar coas voltas do café?
Analizamos, a partir dun estudo sociolóxico realizado na Universidade da Coruña (UDC), a proliferación dunha cultura do xogo que cada vez medra máis nos barrios populares das cidades, coa complicidade de axencias publicitarias, personaxes públicas e grandes corporacións que alimentan de xeito irresponsable unhas pautas de consumo que acaban en adición e no sometemento da poboación a débedas moi elevadas.
Incidencia da publicidade
“Este elemento favorece o incremento de casos de adicción entre a xente moza, xa que perciben como persoas referenciais trasladan a imaxe de que estas actividades son algo positivo”, explica a eurodeputada, quen alerta da normalización do xogo e as consecuencias que pode ter no ámbito social e familiar.
A posibilidade de gañar cartos de maneira fácil, dispoñer de comidas e bebidas máis baratas, e a posibilidade de entrar sen consumir son, xunto a solicitude de microcréditos, reclamos que utilizan estes locais para atraer ao público, segundo advirten as asociacións de persoas afectadas polo xogo.
Para a eurodeputada do Bloque, estes elementos, que inciden especialmente no incremento do xogo entre as persoas menores de 30 anos poñen de manifesto unha realidade que potencia o xogo como alternativa ao lecer “que debe facernos reflexionar sobre a sociedade que queremos construír”.