A Catapulta
Quico Valeiras, corazón ao servizo da poesía

O pulso que percorre a Quico Valeiras (quico) mantén a este carballiñés nunha constante relación de agarimo e dor coa poesía. Agarimo e cariño a unha forma na que encontra as ferramentas axeitadas para dar saída a unha voz única no sistema literario galego. E tamén dor, si, polo respecto e coidado que ten con cada pegada que deixa gravada neste mesmo sistema.

O poeta, con formación en Filosofía e que no 2020 recibiu o premio de poesía Eusebio Lorenzo Baleirón, conta cunha intensa e interesantísima obra poética. Nela abundan as hibridacións con outras artes e apréciase unha vontade de renovación e de experimentación.

A conversa do episodio 14 da Catapulta, o noso programa sobre poesía dirixido e conducido por Samuel L. París, detívose en diferentes aspectos vencellados ao seu labor creativo, á súa relación co universo editorial e coa súa propia obra. 

Ademais de seguir a emisión en directo de cada episodio do programa nas canles de Youtube e Twitch de El Salto, A Catapulta tamén pode escoitarse en formato podcast.

Logo dun breve descanso, o programa retomará as súas emisións despois do verán.