Consejo General del Poder Judicial
Jueces para la Democracia impugna ante o CGPX o acordo do TSXG que apartou a Villares da sala de eólicos

Jueces para la Democracia interpuxo un recurso de alzada ante o Pleno do Consello Xeral do Poder Xudicial contra a resolución do Tribunal Superior de Xustiza de Galiza que separou a Luis Villares e outros tres maxistrados da sala competente para resolver os litixios sobre parques eólicos.

A asociación explicou nun comunicado que, ao seu xuízo, as resolucións “adoecen de graves defectos que poñen en cuestión a inamovibilidade dos maxistrados afectados e, con iso, a propia independencia xudicial”.

A entidade sostén que a decisión se adoptou sen dar audiencia aos catro maxistrados concernidos, entre os que se atopa Villares, membro de Jueces para la Democracia. A iso engade que a medida carece dunha motivación suficiente e que non se respectaron os trámites e contidos que a normativa esixe para este tipo de acordos.

Neste sentido, invoca a sentenza do Tribunal Europeo de Dereitos Humanos no caso Bilinski contra Polonia e a do Tribunal de Xustiza da Unión Europea do 6 de marzo de 2025, que subliñan a necesidade de que decisións desta natureza se sustenten en motivos claros e criterios obxectivos, requisitos que a asociación considera ausentes neste suposto.

A organización advirte de que estes déficits se producen nun “contexto de presión por parte de representantes políticos e empresariais” que, ao seu entender, fai máis necesario aínda extremar as garantías. Lembra, ademais, que segundo a xurisprudencia do TEDH, as irregularidades na composición dos órganos xudiciais poden derivar na nulidade das súas resolucións.

Por iso, Jueces para la Democracia solicitou tamén a suspensión cautelar dos acordos impugnados, e subliñou que está plenamente lexitimada, conforme á Lei Orgánica do Poder Xudicial e á doutrina do TEDH, para actuar en defensa da independencia xudicial.

A asociación trasladou a súa confianza nas institucións e agarda que o Estado de Dereito conxure o que cualifica dun perigo obxectivo para a independencia xudicial e a integridade do sistema xurisdicional europeo.