Culturas
MAPS, a nova aposta polo video experimental feita por e para mulleres novas

Unha nova asociación cultural bota a andar en Vigo coa vontade de abrir ocos que, segundo din as súas propias fundadoras, escasean no panorama artístico galego: os do videoarte e o video experimental. Trátase de Miradas Audiovisuais, Perspectivas Sonoras (MAPS), un colectivo formado por seis mulleres menores de 30 anos que presentará a súa primeira mostra pública o 14 de agosto no espazo Café Uf.

O proxecto naceu, como conta Carlota Sanmartín, unha das integrantes, dun traballo de clase. As seis compañeiras cursaban a mención de audiovisuais dentro do grao en Belas Artes en Salamanca, cada unha procedente dunha cidade distinta —Vigo, Asturias, Aranda del Duero e Valladolid, entre outras—. Foi ao traballar en grupo cando descubriron que compartían unha mesma inquedanza: mentres a pintura, a escultura ou a exposición contan con convocatorias e concursos habituais dentro do ámbito das Belas Artes, o audiovisual apenas ten movemento propio.

Diso xurdiu a idea de constituírse como asociación. Alén de apoiar os proxectos audiovisuais das propias integrantes e distribuír traballos doutros artistas emerxentes, MAPS naceu cunha marca de identidade explícita: configurarse como unha asociación de creadoras. Foi, subliña Sanmartín, unha decisión consciente, coa intención de dar tamén visibilidade a proxectos realizados por mulleres.

Antes desta primeira mostra en Vigo, o colectivo xa tivo unha primeira incursión pública este mes de xuño, cando presentou unha obra propia no Festival Paz de Nápoles, en Italia. A cita do 14 de agosto en Café Uf será, así, a súa segunda actividade pública, pero a primeira concibida como mostra: un espazo para compartir e dar difusión ao traballo doutras persoas creadoras, e non só ao propio.

Sanmartín destaca que o formato desta primeira cita —centrada no video experimental e a videoarte— responde a unha oferta cultural pouco frecuente no panorama actual. Aínda que recoñece que existe actividade cultural diversa, considera que non abundan os espazos dedicados especificamente a este tipo de linguaxes audiovisuais, o que para ela achega diversidade a unha escena que, defende, necesita abrir a mente do público a propostas distintas ás habituais.

A mostra de Café Uf non será a única cita do verán para o colectivo. MAPS tamén participará os días 7 e 8 de agosto en Puebla de Sanabria, dentro do Festival Arriero, onde se proxectarán varios traballos realizados polas integrantes da asociación.