Educación
A Xunta pecha catro escolas unitarias “por falta de alumnado” en Boiro, Mesía, Taboadela e Portas

O Diario Oficial de Galicia (DOG) recolle este martes a publicación dunha nova orde da Consellería de Educación, Ciencia, Universidades e Formación Profesional mediante a que se actualizan as unidades e os postos de traballo docentes dos centros públicos da comunidade. A medida afecta ás ensinanzas de Educación Infantil, Educación Primaria e Educación Especial e inclúe, entre outras modificacións, o peche de catro escolas unitarias situadas nos concellos de Boiro e Mesía, na provincia da Coruña; Taboadela, en Ourense; e Portas, en Pontevedra.

A administración educativa xustifica esta reorganización na necesidade de adecuar a estrutura dos centros á realidade actual da poboación escolar. O obxectivo, segundo explica a propia orde, é axustar tanto o número de unidades como os cadros de persoal docente ás necesidades existentes, ao tempo que se reforza a atención á diversidade mediante a incorporación de profesorado especializado e se mellora a oferta educativa dos centros públicos.

En total, a resolución contempla cambios nas unidades e nos postos de traballo de arredor de 250 centros educativos. Entre eles atópanse colexios de Educación Infantil, centros que imparten conxuntamente Infantil e Primaria, Centros Públicos Integrados, centros específicos de Educación Especial e Colexios Rurais Agrupados.

Un dos aspectos máis destacados da orde é a desaparición de catro escolas unitarias que deixarán de prestar servizo. En concreto, establécese o peche do CEIP Pazos-Comoxo, en Boiro; da EEI de Olas, en Mesía; da EEI de Taboadela, no concello ourensán do mesmo nome; e da EEI de Lantaño, situada en Portas.

A decisión xa fora avanzada anteriormente pola Xunta, que atribuíu os peches á reducida matriculación rexistrada nestes centros e á ausencia de previsións que apuntasen a unha recuperación do número de escolares. A Consellería sinalou entón que a medida respondía á necesidade de adaptar a distribución dos recursos e o mapa educativo á evolución demográfica das distintas zonas de Galiza.

As cifras de alumnado explican, segundo a Xunta, a decisión adoptada. A escola unitaria de Mesía contaba con cinco alumnos matriculados, mentres que a de Taboadela unicamente tiña un estudante. No caso de Portas, eran tres os alumnos escolarizados, e no centro de Boiro a cifra reducíase a dous. Ante estes datos e a falta de perspectivas dun aumento significativo da matrícula, a Administración considerou “inviable” manter abertas as catro unidades.

Ademais de regular os cambios nas unidades e postos docentes, a orde publicada no DOG establece diferentes aspectos relacionados coa situación do persoal funcionario afectado pola reorganización. Entre outras cuestións, contempla a aplicación dos criterios de mobilidade dentro dos propios centros, regula a posibilidade de solicitar os novos postos que se creen e recolle as disposicións relacionadas coa perda do destino definitivo, de acordo coa normativa vixente.

Con esta reorganización, a Xunta pretende axustar a estrutura dos centros públicos á evolución do alumnado e concentrar os recursos dispoñibles alí onde exista unha demanda educativa suficiente, ao mesmo tempo que adapta os cadros de persoal ás necesidades actuais dos centros e do seu alumnado.