Elecciones
O mellor resultado histórico do BNG é insuficiente para quitar a maioría ao PP

O Partido Popular de Alfonso Rueda gobernará durante outros catro anos máis en Galiza. Apenas caben dúbidas. Con case o 100% dos votos escrutados, a estratexia do partido que Alberto Núñez Feijóo deixou en mans dun candidato descoñecido en abril de 2022 hoxe revelouse acertada. Nin sequera a forza arrasadora e histórica do Bloque Nacionalista Galego (BNG) de Ana Pontón conseguiu cambiar a posición dominante da dereita galega. Pontón colleitou un resultado histórico para o soberanismo galego: na nova lexislatura terán máis forza ca nunca con 25 deputados e deputadas, 6 máis dos que colleitaron no verán de 2020. Igualmente, non foi suficiente.

O centro esquerda do PSdeG-PSOE de Xosé Ramón Gómez Besteiro afúndese no máis profundo da súa historia electoral e apenas consegue 9 deputados, 5 menos ca en 2020 e atendendo á fuga do voto cara ao BNG, de facto, descártase a hipótese do castigo á negociación de Pedro Sánchez cos partidos independentistas. Ou cando menos, maioritariamente. Porén, unha das poucas sorpresas deste domingo é a entrada no Parlamento de Galicia de Democracia Ourensana, o partido populista de dereitas do alcalde de Ourense, Gonzalo Pérez Jácome. O partido rexionalista obtén un deputado, pero que apenas terá capacidade de actuación, xa que non poderá condicionar a acción do goberno do Partido Popular. De feito, o partido de Alfonso Rueda volveu gañar en todas as provincias galegas. Nin sequera as sumas dos partidos da esquerda e o centro esquerda supera o Partido Popular.

Galiza castiga sen parangón as esquerdas españolas

Tanto Sumar con Marta Lois como Podemos con Isabel Faraldo volven pegarse de bruzos coa realidade da política galega: nin o conseguiron en 2020 baixo a marca Galicia en Común nin o conseguiron agora indo por separado. Ademais, por moito. Ata a ultradereita de Vox, extremadamente minoritaria en Galiza sacou máis votos ca os dous partidos xuntos. Ningunha das tres formacións, de raíz estatal, quedou nin preto de conseguir un deputado.

A lectura non parece complexa. Ningún partido de matiz e enfoque estatal a excepción do PP, que xa gobernaba Galiza, conseguiu incrementar o seu número de votos, todo o contrario. Nin Sumar nin Podemos nin Vox tiñan implantación territorial ao chegar á apertura das urnas e, ademais, apenas contaban con militancia. Para maior inri, aquel espazo chamado outrora esquerda transformadora e parte minoritaria das mareas decidiu concorrer por separado. A chegada de Democracia Ourensana ao Pazo do Hórreo parece selar máis aínda esa tendencia.

O resultado deste domingo non é definitivo, pero si decisivo

Aínda que o resultado da noite deste domingo non é definitivo, xa que os votos dos cidadáns que sufragaron desde o estranxeiro se contarán a partires do 26 de febreiro, ese resultado apenas influirá na distribución de escanos. Iso si, alongarase como máximo ata o día 29 do mesmo mes. É dicir, o resultado definitivo podería non saberse ata dentro de 11 días. Porén, atendendo ao histórico de datos, o reparto podería variar, como moito, nun escano. Algo insuficiente para variar o taboleiro.

A eliminación do voto rogado, a diferenza das citas electorais anteriores, podería aumentar a participación dos electores exteriores, que representan aproximadamente o 18% do censo electoral de Galiza, con case medio millón de persoas. Isto marca unha diferenza significativa en comparación cos últimos comicios, onde o voto exterior diminuíra debido ás restricións do voto rogado impostas desde 2009. Pero todo parece apuntar a que non será finalmente decisivo.

Unha campaña embulleirada que non lle pasou apenas factura ao PP

Durante os últimos tres días de campaña, o Partido Popular e as institucións galegas convertéronse nun só ente, como acontece desde hai 300 semanas coa Televisión de Galicia. A menos de 72 horas de que abrisen as urnas, a Consellería do Mar de Alfonso Villares decidía ingresarlles a arredor de 7.000 mariscadores e mariscadoras un subsidio de 550 euros para paliar unha mala campaña, supostamente anterior á crise dos pellets, pero cuxa convocatoria se abriu no punto máis álxido do desastre. Pero ao talenario aínda lle quedaban follas. A só dous días das eleccións, este venres, a Xunta, a través da Consellería de Sanidade de Julio García Comesaña enviou decenas de miles de SMS a todo o persoal sanitario de Galiza que traballa no Servizo Galego de Saúde (Sergas) anunciando subas salariais a médicos e médicas, enfermeiros e enfermeiras, técnicos e técnicas. Algunhas delas, acordadas durante marzo de 2023. Pero a revelación de todas estas estrataxemas apenas lle pasou factura ao partido de Rueda que manterá, malia todo, unha maioría absoluta moito máis folgada do previsto a esquerda e dereita.