Feminismos
Charlas, música e emprendemento enchen Santiago de feminismo

Este venres e sábado, 17 e 18 de novembro, ten lugar en Santiago de Compostela o I Encontro Feminista de Periféricas. Nel participan vinte investigadoras, profesoras, artistas e emprendedoras procedentes de Galicia e do conxunto do Estado. O programa combina charlas, obradoiros, networking e actuacións musicais. Todas as actividades teñen en común o seu compromiso co feminismo e os dereitos das mulleres.

O encontro tivo lugar na libraría Lila de Lilith e comezou o venres 17 cunha mesa redonda sobre musulmás que rachan estereotipos tanto nos medios de comunicación como na literatura, e rematou cunha investigación sobre o papel das mulleres kurdas no conflito sirio. Pola tarde tiveron lugar as charlas centradas no amor romántico e as mulleres escritoras.

O evento concíbese como un espazo participativo, combinando as charlas con obradoiros relacionados abertos a todo o público asistente. Traballouse con noticias de prensa, dinámicas de grupo, vídeos e exercicios de autoanálise.

A xornada do venres pechou cunha velada de arte feita por mulleres, coa participación das poetisas Arancha Nogueira e Lara Dopazo Ruibal, recentemente galardoada co premio de poesía Fiz Vergara Vilariño. As tres nebrosas pecharon a xornada, cunha performance con final pandereiteiro.

No día sábado celebraron unha sesión de networking na que presentaron os seus proxectos dez emprendedoras. Entre eles, a empresa de servizos culturais con enfoque de xénero Casa Morada, o proxecto Músicas galegas ilustradas e a Regueifesta, que pon en valor a participación das mozas nun xénero tradicionalmente dominado por homes.

O encontro foi organizado por Periféricas, escola de feminismos alternativos nada en Baio (A Coruña) no ano 2016 e dirixida por Carmen V. Valiña, doutora en historia contemporánea e profesora e investigadora en temas de xénero.