Galego
Queremos Galego convoca unha grande manifestación polo Día das Letras Galegas en Compostela

A plataforma Queremos Galego fixo un chamamento á cidadanía para participar na manifestación que se celebrará este sábado, coincidindo co Día das Letras Galegas, en Santiago de Compostela. Este ano, a mobilización contará cun novo percorrido e culminará cunha gran foliada na Praza do Obradoiro.

Así o anunciaron este mércores, nunha rolda de prensa no CSC Cidade Histórica Maruxa e Coralia, o voceiro de Queremos Galego, Marcos Maceira, e a coordinadora da plataforma, Celia Armas.

A manifestación, que leva por lema “Lingua Vital Xa”, partirá ás 12.00 horas da Alameda compostelá. O novo itinerario levará á marcha pola avenida de Figueroa, San Clemente, a travesa de Fonseca e a rúa do Franco, ata chegar ao Obradoiro.

En anos anteriores, a mobilización partía tamén da Alameda pero continuaba cara á Praza de Galicia, pasando por varias rúas do Ensanche e do casco histórico, e remataba na Praza da Quintana.

Celia Armas explicou que haberá autobuses organizados desde 30 localidades galegas para facilitar a participación. Ademais, o acto final na Praza do Obradoiro será conducido pola actriz Isabel Risco. Tamén animou a todas as persoas a acudir con “pandeiretas, instrumentos de percusión e moito ánimo”.

Pola súa banda, Marcos Maceira apelou á mobilización masiva da sociedade galega: “Esta manifestación ten que ser histórica. Temos que facer historia para comezar a reverter a emerxencia lingüística”, afirmou.

Maceira denunciou que “a Xunta só actúa cando o pobo galego se mobiliza” e sinalou que “o medo á mobilización levou ao PPdeG a simular vontade de cumprir acordos mediante supostas comisións, pero con límites claros no ámbito educativo, na administración, nos medios públicos e nos campamentos de verán”.