Historia
Carlos Barros, o investigador pioneiro que entendeu a relevancia da Revolta Irmandiña para a historia de Galiza

A Revolta Irmandiña é unha das grandes epopeas da historia galega, pero tamén, precisamente por ser un dos episodios máis contados e reivindicados dende a contemporaneidade, tamén é un dos máis mitificados. Este é o primeiro dos cinco capítulos do podcast Verdades e mentiras da Revolta Irmandiña. Un proxecto transmedia no que atoparás catro entrevistas en profundidade con catro persoas de relevancia maiúscula na historiografía galega e que ademais teñen moito que dicir sobre este episodio da nosa historia.

Nesta primeira entrega, o historiador Carlos Barros axuda a desmontar lugares comúns e a situar o conflito no seu contexto social, político e europeo.

Barros, profesor universitario é unha das voces máis recoñecidas na renovación da historiografía medieval galega. Na conversa con David Gesteira, cabeza visible de Descifrando a Historia, aborda as causas profundas da revolta, o papel do campesiñado e das vilas e os límites da interpretación actual do movemento irmandiño. Un episodio que convida a mirar cara a Revolta Irmandiña non como unha excepción violenta, senón como parte dun proceso histórico máis amplo de conflito social na Baixa Idade Media.

Verdades e mentiras da Revolta Irmandiña é o título que abarca unha narrativa transmedia que conta con dúas canles principais: a audiovisual, enfocado ás redes, e o podcast. Producido por O Salto, CRU e máis Descifrando a Historia, poderás atopar pílulas en vídeo nas redes que funcionan a modo de verificadores de feitos dalgunhas das ideas máis estendidas sobre este episodio no imaxinario popular.

Verdades e mentiras da Revolta Irmandiña está financiado con recursos públicos grazas ao certame Fondo de proxectos culturais Reino de Galicia, promovido pola Deputación da Coruña.