Huelga feminista
O 8M máis alá das cidades

Ante as 105.000 asistentes á manifestación deste 8 de marzo en Vigo, as 2000 persoas congregadas en Carballo, en Cangas ou as máis de 1000 que decidiron unirse en Marín o pasado 8 de marzo poden semellar insignificantes. Mais se ás espectaculares cifras das grandes manifestacións desta folga feminista, lle engadimos o pulo con que milleiros de mulleres saíron ás rúas nas distintas localidades galegas, pódese afirmar que o movemento feminista fixo espertar á sociedade como poucas cousas o fixeran antes.

Foi o éxito da folga do 2018 o que animou a moitas vilas a convocar manifestacións por primeira vez. É o caso de Sada, organizada polo Concello, ou o de Cangas, onde a iniciativa partiu da Asamblea Morrazo 8M porque antes “a xente de Cangas marchaba a Vigo e a que non podía, ficaba en silencio. Desde aquí tamén temos que meter presión, por iso este ano nos animamos a facer ruído”. Esa solidariedade e ganas de saír a rúa motivaron que o pasado venres tiveran lugar máis de 55 manifestacións e concentracións. Cangas ou Carballo, segundo o Faro de Vigo e quepasanacosta.gal respectivamente, chegaron a superar as 2000 asistentes.

Obxectivo: Dar voz e rematar coa ignorancia

Se algo marcou as xuntanzas nas vilas pequenas, foi a iniciativa de deixar un micrófono aberto para calquera muller disposta a dar a súa testemuña. En Cangas, a Asociación Púrpura cóntanos como este espazo foi empregado para a denuncia de condutas machistas, a reivindicación de salarios igualitarios e a “reflexión enfurecida da situación da muller”.

Foi na Guarda onde este micro aberto deu forza a tres mulleres, unha delas unha nena, a contar os seus casos de violación, pederastia e violencia machista.“Foi bastante emotivo, porque semellou que a concentración non soamente servira para concienciar e como acto simbólico, senón que se materializou en axudar a mulleres concretas dándolles voz a elas, vítimas do machismo”, conta Sara, unha das manifestantes.

No Carballiño, como en moitas outras vilas, decidiron combatir o patriarcado con cultura. O cineclube e o teatro enchéronse esta semana con obras que tocan temas como a diversidade sexual ou a opresión da muller. As palestras e actos feministas tampouco faltaron e poboaron, de feito, case todas as vilas galegas. O exemplo de Sada tampouco fica atrás, onde un concerto encabezado por mulleres animou aos cidadáns tras rematar a folga.

Á muller traballadora

En Marín, xunto con Cee ou Corcubión, o conflicto de clase estivo moi presente. Son casos que destacan non só pola asistencia –máis de 1000 en Marín segundo Espazo Feminista Marín–, senón pola folga no sector industrial. As fábricas de conxelados marinenses notaron especialmente a falta das mulleres, onde o paro foi “moi considerábel, pois as mulleres desas fábricas traballan en condicións bastante precarias”, afirma Silvia, cidadá da vila.

En Cee e Corcubión, o paro das mulleres de Ferroatlántica foi case do 50%, coincidindo as súas reivindicacións coas dos empregados afectados polos 400 ERE que propón a empresa.

As galegas foron unhas das mobilizacións feministas máis importantes do Estado español. Se ben as grandes cidades destacan, as vilas amosan que o empoderamento das mulleres galegas xa é unha realidade.