Justicia
O Tribunal de Instancia de Santiago comeza a execución da sentenza polo accidente do tren Alvia

A maxistrada titular do xulgado do Penal número 2 de Santiago de Compostela deu luz verde, tras declararse firme a sentenza, ao inicio da execución do fallo relacionado co accidente do tren Alvia que descarrilou na curva de Angrois o 24 de xullo de 2013.

No seu auto, a xuíza indica que “procede levar a efecto os pronunciamentos contidos na sentenza na forma e tempo prescritos no Código Penal e nos regulamentos, acordando a práctica das dilixencias necesarias”.

Así, ordena notificar á defensa do maquinista —condenado a dous anos e seis meses de prisión como autor de 79 homicidios e 143 lesións, todos eles por imprudencia grave— para que se pronuncie sobre unha eventual suspensión da pena “polo motivo previsto no artigo 4.4, parágrafo segundo, do Código Penal, á vista da petición de indulto que se atopa en trámite”.

Respecto da responsabilidade civil, fixada na sentenza e modificada en parte polo fallo definitivo da Audiencia Provincial da Coruña, a maxistrada esixe á aseguradora QBE, na súa condición de responsable civil directa, que “no prazo dun mes abone as cantidades liquidadas pendentes de pago en concepto de indemnización, no caso de que non consten totalmente satisfeitas, desglosando importe, concepto e prexudicado”.

Así mesmo, a xuíza dispón notificar a QBE “a fin de que no prazo dun mes presente proposta de liquidación de intereses por cada un dos prexudicados”. Recibida esa proposta, darase traslado de novo aos afectados para que poidan presentar alegacións dentro da peza separada correspondente. O auto admite recurso, polo que aínda non é firme.