Laboral
O sector do metal bloquea a inauguración da feira patronal Mindtech en Vigo

A segunda xornada das mobilizacións sindicais do sector pontevedrés do metal coincidiron en Vigo coa inauguración da Mindtech, a feira industrial de referencia que organiza a Asociación de Industrias do Metal e Tecnoloxías Asociadas de Galiza (Asime), contraparte na mesa de negociación do convenio provincial do sector que está en curso. As persoas traballadoras, convocadas a semana pasada a tres xornadas de paro e manifestación polos sindicatos CIG, CCOO e UGT, concentráronse na rotonda que dá acceso ao Instituto Feiral de Vigo (Ifevi) e ao aeroporto de Peinador, chegando a cortar as entradas á mesma. Na autopista AP-9 rexistráronse retencións na saída cara ao aeroporto vigués que afectaron a decenas de vehículos.

As representantes das traballadoras sentáronse coa patronal o luns 19, en véspera da segunda xornada de mobilización sindical, mais non houbo acordo. Para Manuel Simón, secretario do metal da CIG na comarca de Vigo, “a patronal chegou á mesa de negociación sen intención de ceder, chamarnos foi unha acción de cara á galería”. De acordo coa CIG, o sindicato maioritario no sector cun 41% de delegadas, “ofreceron unha suba salarial minimamente mellorada do 2% no primeiro ano, pero non entraron na cláusula de revisión salarial nin na subrogación (de traballadoras), que é fundamental para nós”.

O de Pontevedra é o único convenio provincial do metal que falta por negociar e renovar en Galiza. Nos últimos meses houbo mobilizacións sindicais en Lugo, e o ano pasado tamén na Coruña e Ourense. Co IPC actualmente chegando ao 4% de media, pero os prezos da alimentación subindo por enriba do 10%, as traballadoras do sector están exercendo o seu dereito de folga masivamente. Así o celebran desde as organizacións sindicais, a pesar de que a patronal reduce as porcentaxes de participación no paro. Se non se acada un acordo nas próximas 48 horas, a clausura da Mindtech tamén estará animada polo sector do metal o 22 de xuño.