Laboral
O metal segue en pé no segundo día de folga por un convenio digno: “A tensión vai medrar”

Vigo volveu converterse este mércores no epicentro das protestas do sector do metal. Miles de traballadores e traballadoras participaron nunha nova xornada de folga para reclamar melloras no convenio provincial, nun contexto de crecente tensión coa patronal e cun seguimento que os sindicatos cualifican de practicamente total.

Á mobilización sumouse tamén persoal do Comercio do Metal, chamado igualmente a secundar os paros. A marcha percorreu varias rúas da cidade antes de concluír cunha asemblea aberta na Praza da Estrela.

As organizacións sindicais lamentan que, pese ás mobilizacións das últimas semanas, a patronal continúe sen mover ficha nin convocar novos encontros para tentar desbloquear a negociación. Desde a parte social aseguran que existe vontade de diálogo, pero advirten de que o conflito podería intensificarse se non aparecen avances a curto prazo.

A CIG sinalou que, polo momento, non se está a valorar unha folga indefinida, aínda que deixou claro que o calendario de protestas seguirá activo mentres non exista unha negociación “real e útil”. Os sindicatos defenden que a presión na rúa está a ser clave para manter paralizada boa parte da actividade do sector.

Desde UXT insistiron en que as reivindicacións pasan tanto por melloras salariais como por unhas condicións laborais que permitan facer atractivo o sector para novos profesionais. Neste sentido, criticaron que moitas empresas denuncien falta de man de obra cualificada mentres continúan sen ofrecer condicións que favorezan a incorporación de persoal.

Ao remate da manifestación, os representantes sindicais apelaron á unidade dos traballadores para manter a forza das mobilizacións nas próximas convocatorias e reforzar os piquetes informativos durante as xornadas de folga.