Lugo
Os sindicatos esixen a Traballo que tome medidas no “peche patronal” de Sargadelos

Despois de catro días de incerteza ás portas da fábrica de cerámicas Sargadelos en Cervo (Lugo), o propietario da empresa, Segismundo García, permitiu finalmente a entrada das traballadoras. Non sen antes protagonizar un novo incidente. “Deixaron pasar ao groso do persoal ás 07.15h, pero cometeron unha nova humillación deixando fóra a 12 traballadoras sen ningunha explicación”, afirma Xorxe Caldeiro, representante da Confederación Intersindical Galega (CIG) na Mariña lucense, quen asegura que non se deu ningunha razón sobre por que esas persoas foron excluídas.

Horas máis tarde, a responsable de Recursos Humanos permitiu o seu acceso. Segundo explican desde CIG e CCOO, en teoría estaban a esperar a que chegase o dono para falar coas traballadoras afectadas, pero finalmente este non se presentou. “É unha vergoña esta chantaxe e esta falta de respecto cara aos traballadores”, denuncia José Antonio Zan, responsable comarcal da área de Industria de Comisións Obreiras.

As traballadoras de Sargadelos esixen a reapertura da fábrica e rexeitan a “irresponsabilidade” do dono

Laura L. Ruiz

Lugo

Lugo As traballadoras de Sargadelos esixen a reapertura da fábrica e rexeitan a “irresponsabilidade” do dono

Laura L. Ruiz

Os sindicatos apuntan a que a reacción do propietario é “inxustificada” pola multa de Inspección e apuntan a que usa ao persoal para chegar a un acordo coa Xunta de Galiza.

“O primeiro obxectivo, que era lograr que todo o persoal entrase a traballar, estaría cumprido. Pero agora hai que estar atentos para verificar se se cumpren todas as esixencias en materia de saúde laboral sinaladas pola Inspección de Traballo e por todo o esperpento que esta persoa —en referencia ao dono— protagonizou aquí”, declarou Caldeiro a O Salto. O representante da CIG subliña que García mantivo “ilegalmente a todo o persoal fóra” desde o xoves 3 de abril, e esixe que a Administración “cumpra co seu labor” para garantir os dereitos laborais das traballadoras.

O conflito con Segismundo García comezou a semana pasada, cando a Inspección de Traballo comunicou 36 deficiencias en prevención de riscos e saúde laboral, xunto cunha multa de 5.000 euros. O propietario reaccionou colocando ao persoal fronte a dúas opcións: asinar un documento facéndose responsables dos posibles riscos ou non acudir á fábrica e collerse días de vacacións.

CCOO, UXT e CIG cualifican a situación como un “peche patronal”, ao considerar que non existe ningunha razón de peso para paralizar a produción

O xoves, primeiro día en que se pecharon as portas da fábrica, os sindicatos denunciaron a situación diante da Inspección de Traballo e solicitaron unha avaliación sobre se era seguro continuar coa produción. Tras a resposta positiva da Inspección, CCOO, UXT e CIG cualifican a situación como un “peche patronal”, ao considerar que non existe ningunha razón de peso para paralizar a produción. As deficiencias detectadas están relacionadas coa silicose que xa desenvolveron dúas traballadoras, e búscase evitar que outras poidan verse afectadas.

Na comarca da Mariña, onde se sitúa a fábrica, hai gran preocupación pola situación, xa que podería poñer en risco o futuro desta empresa, considerada un referente da cultura galega e que dá emprego directo a máis de 90 persoas, na súa maioría mulleres.