O Salto medra contigo
Ser socia de O Salto ten premio: un dominio .gal e hosting de balde para novas subscricións

O Salto Galiza súmase á campaña ‘Subscríbete ao galego’, unha iniciativa impulsada pola Asociación de Medios en Galego (Amega), dinahosting e PuntoGal para promover o uso da lingua galega no ámbito dixital e fortalecer os medios de comunicación en galego.

Faite socio, faite socia!

Entre o 17 e o 31 de maio, as persoas que se subscriban a O Salto dentro desta campaña recibirán gratuitamente durante un ano un dominio .gal e un servizo de hosting web profesional, un paquete valorado en máis de 170 euros.

A iniciativa coincide coa celebración do Día das Letras Galegas e do Día de Internet e procura impulsar a presenza do galego na rede nun contexto marcado pola crecente concentración dixital nas grandes plataformas. As persoas beneficiarias poderán empregar estes servizos para crear a súa propia páxina web, abrir contas de correo profesionais co seu dominio .gal ou poñer en marcha proxectos dixitais en galego sen asumir custos iniciais.

Desde a organización da campaña sinalan que o obxectivo é dobre: por unha banda, facilitar ferramentas para ampliar os contidos en galego en Internet; pola outra, reforzar economicamente os medios que desenvolven o seu traballo na nosa lingua a través do apoio das subscricións.

As persoas subscritoras recibirán os códigos para activar o dominio e o hosting ata o vindeiro 30 de xuño.

A campaña está promovida por Amega, asociación creada en 2013 para fortalecer o ecosistema mediático en galego; por PuntoGal, entidade xestora do dominio .gal desde 2014; e por Dinahosting, empresa galega especializada en servizos de hospedaxe e rexistro de dominios. Actualmente existen arredor de 7.700 dominios.gal activos.