Ocupación israelí
Nova xornada de mobilizacións na Galiza para reclamar o fin do xenocidio en Palestina

Durante a mañá deste chuvioso domingo tiveron lugar novas mobilizacións por toda Galiza para esixirlle a Israel que poña fin á ocupación dos Territorios Palestinos e que paren os ataques indiscriminados contra a poboación civil bloqueada en Gaza.

As mobilizacións foron convocadas hoxe ás 12 da mañá, unha vez máis, polas catro organizacións de referencia: Mar de Lumes, Galiza por Palestina, BDS e a Asociación Galaico Árabe Jenin. Ademais das sete cidades galegas tamén houbo concentracións nos concellos de Allariz, Betanzos, Burela, Cangas, Carballo, Cee, Monforte, Pontedeume, Ribeira e Vilagarcía.

Unha das máis numerosas volveu ser a manifestación en Vigo, que partíu desde a Vía Norte e rematou coa leitura dun manifesto que finalizaba anunciando “a convocatoria dunha manifestación nacional en Compostela o vindeiro domingo día 29 de outubro en solidariedade co pobo palestino e para esixir que pare a ocupación de Israel e o xenocidio na franxa de Gaza”.

Precisamente hoxe en Compostela a manifestación estivo acompañada dunha intensa chuvia, que non impediu que centos de persoas foran dende a Praza Roxa até Praterías reclamando liberdade e paz para Palestina.

Pola súa banda, ducias de persoas concentráronse esta mañá na Subdelegación de Defensa en Ourense para apoiar a poboación palestina ante o xenocidio cometido por Israel. Berros de reivindicacións, música e un emotivo discurso marcou esta concentración. “Dende Galiza e Ourense denunciamos a limpeza étnica do apartheid, denunciamos a vulneración sistemática do dereito internacional e do dereito humanitario e denunciamos a complicidade dos gobernos imperialistas” leron ao final da convocatoria.

En Lugo, ademais da concentración de hoxe na Praza Maior, o pasado xoves creouse a Plataforma “Lugo por Palestina” e o martes hai unha nova asamblea no Centro Social A Hedreira para continuar a organizar a solidariedade coa xente de Gaza e Cisjordania dende a cidade.

Finalmente para esta semana tamén están previstas a realización de varias conversas co activista palestino Fayez Badawi, antigo voceiro para Europa do Frente Popular para a Liberación de Palestina (FPLP), “unha das voces máis autorizadas para falar contra a ocupación de Palestina e fronte á manipulación mediática” sinalan desde a organización dos “Diálogos desde a periferia: Gaza cara unha nova Nakba” que vai ter lugar o luns 23 ás 20 horas en Ourense, martes 24 ás 19:30 na Facultade de Historia en Compostela, mércores 25 ás 20 horas en Vigo, Xoves 26 ás 20 horas no vello Cárcere de Lugo, venres 27 ás 19:30 en Viveiro, Sábado 28 ás 18 horas na AC Alexandre Bóveda da Coruña e o luns 30 ás 20 horas no Antigo Hospicio de Ferrol.