Pesca
Greenpeace caza a un pesqueiro galego capturando tiburóns protexidos na costa occidental africana

Greenpeace denunciou este domingo ao pesqueiro galego Naboeiro por presuntas prácticas pesqueiras ilegais nunha zona de alta mar situada fronte á costa occidental de África que a organización considera prioritaria para a súa protección baixo o Tratado Global dos Océanos.

A ONG asegura ter documentado a actividade do palangreiro na denominada Zona de Converxencia das correntes de Canarias e Guinea, unha área cuxa actividade pesqueira está regulada pola Comisión Internacional para a Conservación do Atún Atlántico (ICCAT). Segundo as imaxes difundidas pola organización coincidindo co Día Mundial dos Océanos, o buque capturou tres exemplares de raposo do mar (Alopias superciliosus), unha especie cuxa pesca dirixida está prohibida pola súa vulnerabilidade.

Greenpeace sostén que os exemplares foron hisados a bordo en contra da normativa europea, que obriga a liberar de forma inmediata e sen causar danos aos quenllas capturados accidentalmente. Ademais, afirma que as imaxes mostran indicios de cercenamento de aletas, unha práctica expresamente prohibida para os barcos con bandeira da Unión Europea tanto dentro como fóra de augas comunitarias.

A organización tamén solicitou á Secretaría Xeral de Pesca información sobre as capturas e descartes rexistrados polo buque no seu caderno diario de pesca. Segundo Greenpeace, se os exemplares observados nas imaxes non tivesen sido declarados, podería terse producido un novo incumprimento da normativa europea de control pesqueiro.

Ante estes feitos, a ONG pediu formalmente á Secretaría Xeral de Pesca que analice as imaxes e valore a apertura de actuacións de oficio. Así mesmo, considera que o caso evidencia as limitacións dos mecanismos actuais de control da pesca en augas internacionais e reclama unha maior protección da Zona de Converxencia mediante a creación de áreas mariñas protexidas.

A responsable da campaña de Océanos de Greenpeace, Ana Pascual, asegurou que o caso demostra como “algúns barcos usan a impunidade das augas internacionais para saltarse a lei”, unha situación que, ao seu xuízo, ameaza a biodiversidade mariña e a sustentabilidade futura dos recursos pesqueiros.

A organización enmarca esta denuncia no debate sobre a aplicación do Tratado Global dos Océanos e reclama que España manteña o seu compromiso de protexer polo menos o 30% dos océanos para 2030. Tamén pide reforzar a transparencia sobre as capturas pesqueiras, limitar a influencia dos lobbies industriais nas negociacións internacionais e aumentar a vixilancia do cumprimento da normativa pesqueira vixente.