Política
Galiza concentra preto de 7.000 anuncios ilegais de Airbnb sancionados por Consumo

Galiza figura entre as comunidades máis afectadas pola sanción histórica imposta a Airbnb polo Ministerio de Dereitos Sociais, Consumo e Axenda 2030, de Pablo Bustinduy. En total, a plataforma publicitou 6.956 anuncios de vivendas turísticas ilegais en Galiza, a inmensa maioría —6.897— por carecer do número de rexistro obrigatorio, segundo os datos aos que tivo acceso Europa Press.

Estas cifras sitúan a Galiza como a terceira comunidade con máis anuncios ilícitos, só por detrás do País Valencià e Canarias, dentro dun expediente que concluíu cunha multa de 64 millóns de euros á empresa, a segunda mais elevada imposta por Consumo a unha compañía privada.

A ausencia do número de rexistro é a irregularidade máis habitual detectada polo ministerio en todo o Estado e tamén en Galiza, onde este requisito xa era esixido pola normativa autonómica antes da entrada en vigor da Ventá Única Dixital. Esta ferramenta, activa desde este ano, obriga agora a que todos os anuncios de aloxamentos turísticos en España inclúan un código oficial de identificación.

O ministro Pablo Bustinduy explicou que o expediente se iniciou tras advertir a Airbnb, en outubro de 2024, da existencia de miles de anuncios ilegais. Ante a negativa da plataforma a retirar-los, Consumo abriu o procedemento sancionador en decembro dese mesmo ano. “A multa chega pola inacción da empresa tras ser notificada”, subliñou o ministro.

No conxunto do Estado, Consumo detectou 65.122 anuncios ilegais, dos cales máis de 59.000 non incluían número de rexistro e preto de 5.800 utilizaban códigos falsos ou incorrectos. No caso galego, esta práctica converteuse no principal foco de incumprimento, nun contexto de crecente presión sobre o mercado da vivenda en zonas turísticas e urbanas.

Airbnb mostrou o seu desacordo coa sanción e sostén que a obriga de verificar a inclusión do número de rexistro nos anuncios non era esixible ás plataformas cando se produciron os feitos. Non obstante, Bustinduy recalcou que a sanción é firme e que a compañía deberá abonala, sen prexuízo de que poida recorrela ante a Xustiza.

A actuación do Ministerio reforza o control sobre o aluguer turístico en Galiza, unha comunidade onde o crecemento deste tipo de aloxamento xerou un intenso debate político e social polo seu impacto no acceso á vivenda e na regulación do sector.