Medio rural
Choiva de formigas, terra e fariña no día grande do Entroido de Laza

Este luns, no epicentro dun dos entroidos máis famosos de todo o Estado, en Laza (Ourense) arrincaba o Luns Borralleiro, un dos días máis significativos do Entroido en toda Galiza. Durante a mañá, unha das principais prazas da aldea, a da Picota, convértese nunha batalla de farrapos cheos de lama. De aí o nome de farrapada, que é como se denomina esta parte da celebración tradicional.

En canto cae o atardecer, recollido nesta fotorreportaxe, comeza a baixada da Morena, unha  personaxe que se compón dunha cabeza de vaca tallada en madeira e que é dirixida por unha persoa da aldea. Desde o seu arranque, a Morena vén acompañada de xente da aldea que previamente foi ao monte a buscar formigas para tirarllas á xente para que a piquen. Tradicionalmente, contan algunhas veciñas, isto facíase para lanzarllas só ás mulleres, pois críase que favorecía a fecundidade: é un dos animais que máis se reproduce.

A Morena arrinca a súa saída en canto un visitante foráneo é subido a unha burra e lle dá un bico na súa cabeza de madeira. A xente da aldea finxe que a súa elección é algo excepcional e a persoa escollida cada ano vólvese o foco da brincadeira de toda a aldea. Nese momento, a Morena, veciños e visitantes camiñan até chegar á praza da Picota, onde se dá por terminada a festa bebendo, comendo e celebrando en colectividade.