Sanidad pública
Unha ILP para salvar a atención primaria na sanidade galega

No pasado mes de febreiro o persoal sanitario galego conseguiu encher a Praza do Obradoiro en Compostela reclamando reverter as consecuencias do fracasado sistema de xestión actual na atención primaria: unha semana de espera para ser atendido no médico de cabeceira, consultas telefónicas en lugar de presenciais, servizos de urxencias e PACs pechados ou sen servizos mínimos, etc. Unha situación que levan denunciando anos dende a Plataforma SOS Sanidade Pública e que afecta sobre todo as zonas rurais, pero tamén ás comarcas máis poboadas, como poida ser o Salnés ou o Barbanza. Lembremos que Feijoo foi o responsables do SERGAS nos anos 90, onde comezaron primeiros intentos privatizadores —as fundacións— que remataron ‘rescatadas’ con diñeiro público.

Colapso na sanidade pública galega

Elena Martín Pablo Santiago

1

Sanidad pública

Colapso na sanidade pública galega

Elena Martín ,  Pablo Santiago

1

O colapso na atención primaria e nas urxencias son o resultado dunha privatización implacábel que favorece o lucro de xigantes empresariais como Medtronic.

Na actualidade estase a tramitar no Parlamento Galego unha Iniciativa Lexislativa Popular (ILP) —vai ir a votación o próximo 9 de maio— que recolleu máis de 55.000 sinaturas no país e que contén todas as medidas urxentes e necesarias recomendadas polas organizacións sanitarias para resolver os problemas actuais do SERGAS, orixinados pola xestión privatizadora da Xunta de Galicia. Entre as referidas medidas destacan: a atención persoal ao paciente como regra xeral para as consultas médicas, correspondéndolle a el ou a ela a decisión de ser atendido de forma telemática. Paralelamente, determínase tamén que deba existir sempre a opción de ser atendido por unha persoa ao chamar por teléfono aos servizos sanitarios e non por unha máquina como sucede na actualidade.

Coa ILP recolléronse máis 55.000 sinaturas e contén todas as medidas urxentes e necesarias recomendadas polas organizacións sanitarias para resolver os problemas actuais do SERGAS

Do mesmo xeito, na ILP recóllense unha serie de medidas para fixar uns mínimos razoables de dispoñibilidade de centros e persoal para salvagardar a debida calidade da atención primaria aos pacientes, proporcionando unha atención sanitaria en igualdade tendo en conta as diferencias de cada xénero. Nese senso, a saúde reprodutiva e sexual das mulleres ten necesidades específicas que necesitan ser atendidas por matronas. Non ter en conta esta especificación implica abrir unha fenda de xénero e unha desigualdade sanitaria, polo que na ILP establécese un mínimo de 1 matrona por cada 5.000 mulleres. Destacan entre estas medidas a obrigación de publicar, como mínimo, unha convocatoria de prazas anual, a recuperación dos consultorios periféricos e o incremento e redimensión dos cadros de persoal dos centros de saúde.

Lembremos que xa no ano 2009 a Xunta chegou a un acordo coa mesa sectorial para resolver a precariedade laboral dos e das traballadoras sanitarias galegas pero que o devandito acordo nunca chegou a executarse. Na actualidade son as peor pagadas do Estado e non están equiparados nin sequera co resto do funcionariado da propia Xunta de Galicia. As condicións de explotación laboral obrigan a moitas traballadoras do sector a marcharse fóra, o que agrava a falta de persoal existente, orixinada pola mala xestión e a intencionada falta de formación de novos profesionais, pois durante anos a Xunta de Galicia negouse a convocar todas as prazas dispoñibles de novos MIR. Pola súa banda, Vanessa Viquendi, representante de Pediatras e Matronas Xa, quixo resaltar para este medio que o recente acordo co sindicato minoritario CESM non beneficia en absoluto á poboación, pois simplemente sobe o salario ao persoal que tamén traballa na sanidade privada. É dicir, a Xunta está empregando fondos públicos para algo que non repercute en absoluto nos pacientes, ademais de deixar clara a estratexia por parte da Administración Galega de seguir favorecendo permanentemente á Sanidade Privada.

O obxectivo da presente ILP non pretende suplantar a Lei Galega de Saúde senón implementar unha serie de medidas para revitalizar e fortalecer os mecanismos sanitarios de Atención Primaria

Finalmente, propoñen recuperar as Xerencias de Atención Primaria e desenvolver as competencias dos Consellos de Saúde de Área Sanitaria e do Consello de Saúde de Galicia. Dende a Plataforma SOS Sanidade Pública reivindican as Xerencias de Atención primaria coma un elemento esencial e chave para repartir os recursos e organizar a asistencia primaria atendendo as particularidades de cada área sanitaria. Por outra banda, coa presente Lei búscase aumentar a capacidade de participación cidadá nos Consellos de Saúde de Área Sanitaria e o Consello de Saúde de Galicia, dándoselle maior peso e relevancia nos devanditos órganos.

A Plataforma SOS Sanidade Pública lembra que a recollida de sinaturas segue aberta na súa web e que o obxectivo da presente ILP non pretende suplantar a Lei Galega de Saúde senón implementar unha serie de medidas para revitalizar e fortalecer os mecanismos sanitarios de Atención Primaria, garantindo unha cobertura de calidade á poboación e unhas condicións de traballo dignas para o persoal. Anuncian que o vindeiro día 9 de maio —cando se leva a votación da ILP en sede parlamentaria— seguirán as mobilizacións cunha concentración diante do Parlamento Galego ás 10 da mañá, onde está convocada toda a cidadanía galega.