Opinión
Non están sós!

Este xoves vimos en directo un golpe máis ás vidas palestinas. Mentres un grupo ía recoller comida, as balas da crueldade asasinaron sen piedade. É deshumanización absoluta que doe.

Máis de 30.000 persoas asasinadas, máis de 70.000 feridas, máis de 360.000 vivendas destruídas ou danadas, infraestruturas civís destruídas -como hospitais e universidades-, e aproximadamente 2 millóns de persoas desprazadas pola forza son as terribles cifras que nos deixan os ataques israelís.

Cantas máis persoas asasinadas fan falta para que a comunidade internacional presione a Israel para que deixe de matar impunemente? Cantos bombardeos fan falta para evitar unha catástrofe humanitaria como a que está vivindo o Pobo palestino en Gaza?

Hai un mes, a Corte Penal Internacional ordenou a Israel que proporcionase “medidas cautelares inmediatas y efectivas” para protexer á poboación palestina na Franxa de Gaza asegurando suficiente asistencia humanitaria e permitindo servizos básicos. Pois ben, Israel incumpre sistematicamente este e calquera outro ditame da xustiza internacional sobre a protección da poboación civil.

No centro loxístico de recollida e distribución de axuda humanitaria internacional hai até 2.000 camións bloqueados por Israel cargados de material humanitario

Pero Israel non só mata con bombas. A degradación moral do goberno sionista vai máis alá. Tal e como puiden comprobar a fin de semana pasada indo ao paso fronteirizo de Rafah, -situado entre Exipto e a Faia de Gaza-, no centro loxístico de recollida e distribución de axuda humanitaria internacional hai até 2.000 camións bloqueados por Israel cargados de material humanitario. Alimentos, auga potabolizadores, bombas de osíxeno, medicinas e material sanitario, xeradores eléctricos e tendas para dar acubillo as persoas que perderon a súa casa polos bombardeos, entre outros materiais, son retidos polo exército sionista. É inmoral que morran bebés por falta de leite mentres hai camións bloqueados!

Non son necesarias máis palabras nin máis denuncias, son imprescindibles accións: cese ao fogo inmediato e que se protexan as vidas, porque se non os matan por bombas mátanos de fame e sede. Por iso as 21 axencias internacionais e os 40 países donantes desa axuda internacional que rexeita Israel teñen que presionar sen descanso para que Israel cumpra a lexislación internacional e para que o alto ao fogo sexa inmediato e permanente.

E por iso que son imprescindibles sancións inmediatas, o embargo de armas e a suspensión inmediata do acordo entre a Unión Europea e Israel

Na construción do relato de deshumanización do Pobo palestino, no que Israel tanto se está esforzando, os ataques sen probas á Axencia de Nacións Unidas para os Refuxiados de Palestina en Oriente Próximo (UNRWA) son outro dos piares fundamentais. Estas acusacións sen probas forman parte da estratexia que desenvolve Israel contra o Pobo palestino, xa que a UNRWA presta apoio a 5 millóns de palestinos e palestinas rexistradas en Oriente Medio e dá refuxio, educación e servizos básicos a un millón de persoas desprazadas en Gaza, desenvolvendo a súa labor en situacións de alto risco. Demonizan á UNRWA para evitar que a poboación palestina desprazada perda a súa condición de “persoa refuxiada” e así impedir o retorno amparado por Nacións Unidas.

Hai que rematar coa impunidade de Israel. Desde hai décadas destrúe impunemente miles de infraestruturas en territorio palestino, -casas, escolas-, unha boa parte delas financiadas por organismos internacionais, principalmente pola UE e os seus Estados membros. Ampara os asentamos ilegais e a ocupación pola forza, a opresión e o apartheid. Israel é un Estado xenocida que perdeu o relato internacional aínda que siga tendo impunidade, porque cos bombardeos indiscriminados sobre a poboación civil e co bloqueo de axuda humanitaria só amosa o seu colapso moral.

Cada vez, aínda que non o pareza, hai máis voces denunciando a masacre e a aniquilación en Gaza. E por iso que son imprescindibles sancións inmediatas, o embargo de armas e a suspensión inmediata do acordo entre a Unión Europea e Israel. Evitar a catástrofe humanitaria en Gaza é unha obriga. Porque o Pobo palestino ten o dereito a vivir en paz na súa terra. Non choremos aínda que doa. Presionemos e fagamos boicot. Esixamos accións contra o xenocidio.

En Al Arish, unha muller palestina que visitei no hospital e que perdeu ao seu home ficando con dous bebés, díxonos: estamos sós, loitade por nós.