Violencia policial
Cen colectivos secundan a mobilización en Compostela contra o asasinato dun migrante por un policía na Coruña

Deceas de persoas acudiron en apoio a concentración convocada polo movemento antirracista galego na mañá do 25 de febreiro, cando se cumpren dous meses do asasinato do mozo migrante, Henry Casimiro, a causa dos disparos da Policía Nacional no Polígono da Grela (A Coruña). “Se fora branco sería noticia nacional”, “o silencio é complicidade” ou “non é un caso illado, é racismo do Estado”, foron algunhas das consignas que se berraron durante o percorrido dende a Praza Roxa ata a Praza do Toural, en Santiago de Compostela, onde se fixo a lectura do comunicado apoiado por máis de cen organizacións, asociacións e colectivos de Galiza, Madrid, Barcelona, ​​Valencia ou Canarias.

No manifesto esixiuse xustiza para Henry e a súa familia, que se abra unha investigación a fondo e a responsabilidade política e institucional ante a “brutalidade policial” que desembocou nun “asasinato racista” a mans das forzas de seguridade do Estado español. Consideran que a actuación foi desproporcionada, debido a que se trataba dun home só, sen outros civís aos que danar, nun polígono afastado, fronte a unha patrulla policial. Ademais, como máis tarde se soubo por declaracións da súa familia, Henry era unha persoa con esquizofrenia diagnosticada, e podería ser que tivera un brote. Pola súa banda, a Policía Nacional alegou diferentes versións do acontecido o que suscitou moitas dúbidas e confusión. Primeiro alegaron que o disparo foi “accidental” e dirixido ás pernas para tentar inmovilizar á Henry que tentaba escapar. Máis tarde, mudaron a versíon sinalando a necesidade de disparan en defensa propia pola agresividade do “delincuente”.

Así mesmo, sinalaron que no tratamento dos feitos nos medios de comunicación, as persoas negras e latinas son sinaladas como máis violentas, constituíndo unha das xustificacións racistas do uso desproporcionado de medidas coercitivas. Ademáis de que a orixe da vítima segue a utilizarse como  “agravante” sen sinalar a súa orixe racial como detonante dunha actuación policial violenta e desproporcionada.

“Denunciamos que estes acontecementos forman parte do armazón institucional e policial de supremacía branca, racista e colonial, no que as detencións por perfilamiento racial son diarias, por moito que fosen condenadas abertamente e de maneira reiterada por institucións internacionais”. A concentración, que tamén tivo convocatoria na cidade de Coruña, conta co apoio doutras manifestacións en Valencia e Tenerife e actos de apoio noutros puntos do Estado español.