Violencia policial
O asasinato dun migrante a tiros por un axente na Coruña reabre o debate sobre a violencia policial

A Policía Nacional asasinou este luns a tiros a un home migrante de 35 anos que, segundo o relato policial, estivera golpeando cunha barra de ferro cristais de vehículos nunha gran avenida na cidade da Coruña, coa suposta intención de obter algo de diñeiro. Sempre segundo o relato policial, despois de “desobedecer” os primeiros avisos dos axente e debido á súa actitude “moi violenta”, os axentes utilizarían sen éxito unha pistola táser antes de dispararlle cun arma de fogo e causarlle a morte.

O asasinato a tiros no polígono da Grela do home armado soamente cunha barra de ferro puxo de novo sobre a mesa o debate sobre a violencia policial e a desproporcionalidade no uso da forza por parte dos corpos e forzas de seguridade do Estado. Estaban os axentes implicados o suficientemente formados para reducir á persoa falecida empregando a superioridade numérica e non causándolle a morte? En caso de cumprirse a presunta e aínda non contrastada necesidade de abrir fogo contra el, os axentes estaban capacitados para executar disparos a zonas non vitais que contivesen á vítima pero que non acabasen coa súa vida de forma inmediata? Influíu na decisión de matalo que fose unha persoa racializada?

La policía ya no necesitará orden judicial para entrar en una morada aun sin delito flagrante

Marina Olmo Sastre

10

Análisis

Análisis La policía ya no necesitará orden judicial para entrar en una morada aun sin delito flagrante

Marina Olmo Sastre

10

Un Jurado Popular ha sentado un precedente peligroso al absolver a los agentes de la “patada en la puerta” de un delito de allanamiento estableciendo que tienen derecho a entrar a la fuerza sin orden judicial por infracciones administrativas.

Sobre esta actuación policial, a principal organización de defensa dos dereitos humanos centrada no racismo e a xenofobia, SOS Racismo Galicia, ten claro que foi “unha actuación totalmente desproporcionada”. “A primeira hora do día [onte, luns], a causa do falecemento era que lle dispararon ás pernas e que, tras revolverse, matárano fortuitamente”, critica Esther Lora, de SOS Racismo. “Agora, a versión cambiou totalmente para dicir que o home lle ía a pegar a un policía cunha barra de ferro na cabeza”, explica Lora. A diferenza entre ambas as versións, emitidas polos sindicatos e as fontes policiais a través dos medios de comunicación de masas de Galiza, é fundamental: “Se a primeira é a correcta, queren dicir que mataron a un home que se escapaba para paralo? É gravísimo”.

No propio baile de versións que houbo nas últimas 24 horas, parecía quedar claro que a persoa asasinada pola Policía Nacional soamente rompería os portelos de varios coches e causado danos en caixeiros automáticos dalgunhas sucursais bancarias. “É moi perigoso normalizar disparar a unha persoa que se estaba escapando”, matiza Esther Lora. Algo que comparten plenamente desde o colectivo Coruña Antifa: “Se isto non se esclarece, pode sentar un precedente terrible de impunidade para outros axentes en futuras actuacións”.

Ambas as organizacións esixen que se abra unha investigación que esclareza os feitos: “Non é o mesmo disparar por detrás a unha persoa que esta fuxindo e matalo, que dispararlle supostamente a zonas non vitais porque ía atacar a un axente e matalo tamén. En ambas as versións cremos que é unha actuación intolerable”, argumentan desde SOS Racismo. O gran número de axentes acudidos na zona tamén é un agravante para os e as integrantes de senllos colectivos: “Foi nun escampado. Realmente era necesario chegar a iso?”. E a outra pregunta clave: “Terían actuado da mesma maneira se a persoa non fose un home negro? A hemeroteca e as estatísticas dinnos que non”, recalcan en SOS Racismo.

Dende Coruña Antifa inciden tamén nunha potencial vontade da Policía Nacional de “encubrir unha posible neglixencia” que, ao seu xuízo, tamén abona o campo para a aparición “dun racismo extremo” nas redes sociais: “Calquera pode botar un ollo a todas as manifestacións racistas e xenófobas onte nos comentarios de redes das noticias en prensa”. Algo que eles e elas atribúen á lezitimación durante o último lustro dos partidos de extrema dereita españois e a “radicalización á que levou aos corpos policiais”.

Deshumanización na prensa galega

Tanto SOS Racismo como Coruña Antifa reproban sen matices a actuación dos grandes medios de comunicación galegos que soamente deron a versión do Sindicato Unificado de Policía, “aínda que isto significase ir cambiándoa sobre a marcha e caer en contradicións en apenas horas de diferenza”. Ademais, o enfoque en radios, televisións e prensa escrita tratou de despersonalizar e deshumanizar o ocorrido. “A Policía abate”, “Un home violento morre”... “Estamos a falar dun cervo ou dunha persoa? Ven na necesidade de explicar unha e outra vez que era supostamente violento para lexitimar o asasinato? É intolerable esa falta de profesionalidade”, pregúntase Esther Lora, de SOS Racismo

Os sindicatos policiais piden “máis seguridade”

A versión ofrecida polo Sindicato Unificado de Policía céntrase agora en que o home “tentou asasinar” a un axente da Policía Nacional, ata que este o matou nas inmediacións do polígono da Grela, nun escampado xunto ás antigas vías do tren da Coruña. Segundo esa versión, os axentes tiveron que pedir reforzos aos policías municipais, algo que aproveitaron para pedir “medidas na cidade” sobre seguridade.

Na versión policial, sempre difundida a través da prensa, tamén se bailou no relato da utilización dunha pistola táser previa ao uso da arma de lume. Nuns primeiros testemuños, a pistola táser non funcionaría porque o home “era moi corpulento”, nas últimas versións, o que limitou o efecto foi “as capas de roupa” que levaba. “A violencia non pode medirse en abstracto, ten que traducirse en algo concreto e, polo de agora, non houbo ningunha proba que transcendera de que iso foi así. É moi necesario que se investigue de maneira independente”, rematan desde SOS Racismo.