Xunta de Galicia
A Xunta Electoral amoesta a Rueda por facer propaganda institucional con vivenda pública

A Xunta Electoral Provincial de Pontevedra amoestou o presidente da Xunta, Alfonso Rueda, por utilizar unha visita ás obras de vivenda pública do barrio vigués de Navia para difundir mensaxes sobre os logros do seu Goberno. A resolución, ditada o pasado 28 de outubro tras unha denuncia do PSdeG, considera que o presidente incumpriu a lexislación electoral ao realizar declaracións que eloxiaban a xestión do Executivo galego durante o período electoral.

O organismo ordena á Xunta retirar a nota de prensa daquela visita, celebrada o 14 de outubro, tanto da súa páxina web como de calquera outra canle institucional na que se difundise. Tamén lle pide a Rueda que se absteña de realizar ou publicar comunicacións institucionais que vulneren a normativa mentres dure o proceso electoral.

A resolución considera vulnerado o artigo 50.2 da Lei Orgánica do Réxime Electoral Xeral (LOREG), que prohibe aos poderes públicos organizar actos ou difundir mensaxes que conteñan alusións ás realizacións ou aos logros obtidos durante o mandato. Contra a decisión cabe recurso ante a Xunta Electoral Central.

O PSdeG denuncia outros dous actos de Rueda

A amoestación súmase a outras dúas denuncias presentadas polos socialistas galegos ante a Xunta Electoral. Unha delas refírese á comparecencia de Alfonso Rueda e o conselleiro de Facenda, Miguel Corgos, posterior á reunión do Consello da Xunta do 16 de outubro, na que se aprobaron os orzamentos para 2027.

No seu escrito, o PSdeG sostén que ambos responsables non se limitaron a informar dos acordos adoptados, senón que aproveitaron a comparecencia para eloxiar a xestión do Goberno galego en materia fiscal e orzamentaria. Os socialistas cuestionan as referencias a comparacións con outras comunidades, incrementos orzamentarios, fitos históricos e prioridades do Executivo.

A terceira denuncia refírese a un anuncio realizado por Rueda durante a sesión de control do Parlamento galego do pasado 7 de outubro. O presidente avanzou entón unha partida de sete millóns de euros para axudar os concellos a construír vivenda pública municipal, unha iniciativa que a Xunta tamén difundiu a través das súas canles institucionais.

O PSdeG considera que este anuncio vulnera igualmente as restricións da lexislación electoral sobre a comunicación dos poderes públicos durante os procesos electorais.