Activismo
Un grupo de activistas maniféstase en Vigo fronte ao hotel onde se concentra o equipo israelí de La Vuelta

Algo máis dun cento de persoas manifestouse a tarde deste luns en Vigo fronte ao Hotel Coia, situado no barrio obreiro homónimo. Dentro do edificio alóxase o equipo Israel Premier-Tech, participante en La Vuelta a España e sinalado polos activistas como “cómplice” do xenocidio que o Estado de Israel está cometendo en Palestina.

Convocados de forma esporádica a través das redes sociais ás 17h, coas bandeiras palestinas e os cánticos contra a masacre sionista en Gaza e Cisxordania, o grupo de persoas mantívose en pé ás portas do hotel durante máis de dúas horas e media.

Tras a concentración, unha parte dos manifestantes desprazáronse ao centro da cidade, na conexión das rúas Urzaiz e Colón, onde os esperaba unha concentración aínda máis grande pero cun mesmo obxectivo: seguir escalando a presión sobre o goberno ultradereitista de Benjamin Netanyahu.

Ambas as dúas concentracións tiveron lugar durante a xornada de descanso dos ciclistas antes da decimosexta etapa da Volta, que arrancará este martes. O percorrido, accesible na web da organización e divulgado polos movementos sociais de apoio a Palestina, arrancará en Poio, dirixirase a Tui e acabará en Herville tras pasar polo Baixo Miño.

Desde o movemento para o boicot, a desinvestimento e as sancións contra Israel (BDS Galiza) chaman a participar nas protestas que se levarán a cabo desde as 13h ata as 17.30h ao longo de todo o percorrido polo sur da provincia de Pontevedra.