Altri
Máis de dez mil persoas mobilízanse por terra e mar na Illa de Arousa contra Altri e a mina de Touro

A ría de Arousa volveu ser este domingo escenario dunha manifestación masiva, tanto por terra como por mar, co obxectivo de frear o proxecto de planta de celulosa que Altri pretende instalar en Palas de Rei e a reapertura da mina de Touro-O Pino.

Antes de que a marcha botase a andar, o presidente da Plataforma en Defensa da Ría de Arousa (PDRA), Xaquín Rubido, deixou claro o horizonte da mobilización: “Estamos obrigados a deter estes proxectos e este modelo industrial que prexudica o conxunto de Galiza”. A convocatoria partiu desta entidade xunto a Ulloa Viva e a Plataforma Mina de Touro-O Pino Non.

Baixo o lema Re-matemos Altri e a mina de Touro-O Pino, o cortexo percorreu A Illa desde a praia de O Vao ata o porto de O Xufre. Segundo os datos da organización, participaron máis de dez mil persoas en terra, mentres que preto de trescentas embarcacións arrouparon a protesta polo mar, facendo soar as súas buzinas ao achegarse ao punto de chegada. As omnipresentes camisetas e pancartas co “Altri non” acompañaron unha vez máis os cánticos, entre eles o de “Espolio e miseria é o que nos deixan”. Algunhas persoas luciron caveiras na cabeza para simbolizar o impacto ecolóxico que as plataformas atribuén a ambos os proxectos.

Rubido acusou o presidente da Xunta, Alfonso Rueda, de “sacrificar” o río Ulla e a ría de Arousa en beneficio de “uns poucos privilexiados”, e afirmou que estas iniciativas industriais “destrúen o tecido produtivo e desarticulan o territorio”. Pola súa banda, a portavoz de Ulloa Viva, Marta Gontá, foi máis aló e esixiu a dimisión de Rueda e das conselleiras de Economía e Industria, María Jesús Lorenzana, e de Medio Ambiente e Cambio Climático, Ángeles Vázquez: “Se non son quen de protexer os recursos de todos, deberían ceder o seu posto a persoas máis formadas e máis empáticas”.

O manifesto, lido no porto por representantes das tres plataformas, subliñou que a mobilización responde á defensa da auga como “modo de vida” fronte ao que denominaron “proxectos depredadores”. “Non nos van desmovilizar, porque aínda hai percorrido para seguir presionando en Galiza, en España e en Europa”, rematou o texto, que reclamou a denegación dos dous proxectos, o fortalecemento dos sectores produtivos tradicionais e a protección ambiental do Ulla e da ría.

Pontón pide o arquivo de Altri e a paralización da mina

A marcha contou tamén coa presenza da portavoz nacional do BNG, Ana Pontón, que reiterou a súa esixencia de “peche definitivo de Altri” e instou ao goberno do PPdeG a denegar “todos os permisos e autorizacións” ao que cualificou de “bomba ambiental”. Rexeitou igualmente a “megaminería contaminante” e alertou sobre o control da mina de Touro-O Pino por parte de “fondos voitre”. “Entre o espolio e Galiza, o BNG sempre está con Galiza”, afirmou. Aínda que recoñeceu que “a forza da xente conseguiu parar Altri” —actualmente en proceso de arquivo—, chamou a “non baixar a garda”.

Cobre San Rafael defende o seu proxecto

A empresa promotora da reapertura da mina, Cobre San Rafael, aproveitou a xornada para reiterar o seu “compromiso coa produción sostible de cobre”. A compañía lembrou que o proxecto actual foi declarado Proxecto Industrial Estratéxico (PIE) pola Xunta en 2024 e que incorpora melloras técnicas respecto ao anterior, presentado en 2017, con maiores garantías de protección ambiental. Pese á recente sentenza do Tribunal Superior de Xustiza de Galiza (TSXG) favorábel á súa actuación, Cobre San Rafael manifestou a súa vontade de “mirar cara ao futuro” e de renunciar ás vías administrativas e xudiciais do expediente anterior, apostando polo novo proxecto como fórmula para conciliar actividade económica, creación de emprego e respecto ao medio natural.