Altri
A oposición a Altri e á mina de Touro tomará A Illa de Arousa este domingo

Varias plataformas convocaron para este domingo, 14 de xuño, unha manifestación en A Illa de Arousa contra os proxectos de Altri e a mina de Touro-O Pino. A Ulloa Viva, A Plataforma en Defensa da Ría de Arousa e Mina de Touro-O Pino Non presentaron a mobilización nunha rolda de prensa celebrada a bordo do bateeiro Carallada, no porto de Xufre, para defender o río Ulla e a ría de Arousa. A marcha arrincará ás doce do mediodía desde a praia de O Vao e percorrerá o territorio por terra e por mar ata rematar no porto, onde confluirá cunha flota de embarcacións chegadas desde as zonas norte e sur da ría.

Os presidentes de Ulloa Viva e da PDRA, Juan Pedro Sánchez e Xaquín Rubido, xunto coa portavoz de Mina de Touro-O Pino Non, Che Cancelo, advertiron de que nin as empresas —Altri e Cobre San Rafael— nin a Xunta teñen intención de renunciar á tramitación destes proxectos.

As tres plataformas deixaron claro que a única resposta que aceptarán é a denegación definitiva dos proxectos

Rubido denunciou a situación que cualificou de “agónica” para a ría, acusou ao goberno galego de promover proxectos contaminantes e cifrou as perdas económicas do sector entre 2021 e 2025 en 59 millóns de euros. Os convenios ofertados pola Consellería do Mar, engadiu, non son máis ca “unha esmola propagandística” para disimular a inacción da Xunta.

Pola súa banda, Cancelo alertou dunha ofensiva que describiu como “agresiva e autoritaria” por parte do goberno galego en favor das empresas promotoras e en contra dos intereses da cidadanía. As tres plataformas deixaron claro que a única resposta que aceptarán é a denegación definitiva dos proxectos.