Educación pública
O profesorado galego desafía o desmantelamento da educación pública cunha nova folga contra a Xunta

Representantes de CIG-Ensino, STEG e as Asembleas Abertas do Ensino Público convocaron para este martes 28 de abril unha folga do profesorado galego, acompañada dunha manifestación que partirá ás 12h da Alameda de Santiago de Compostela, co obxectivo de esixir á Xunta unha negociación.

Os sindicatos acusan o conselleiro de Educación, Román Rodríguez, de “non escoitar o sentir maioritario” dos docentes e instárono a “sentarse a negociar sen impoñer sinaturas de cheques en branco”, segundo sinalou a secretaria nacional de CIG-Ensino, Laura Arroxo. “Durante estes meses vimos como o conselleiro o que está a facer non é sentarse a negociar, non é xuntarse connosco para intentar mellorar o ensino público, senón que o que está a facer precisamente son manobras desmovilizadoras”, denunciou.

Arroxo tamén o acusou de “negarse rotundamente” a recibir as organizacións sindicais, argumentando que calquera negociación debía pasar polo acordo de melloras existente. “Aquí hai que dicirlle ao conselleiro que a Comisión de Seguimento do Acordo de Melloras non é un órgano para negociar”, advertiu.

Ademais da folga e a manifestación do 28 de abril, as organizacións anunciaron mobilizacións descentralizadas por toda Galiza a semana seguinte. As súas principais reivindicacións inclúen a baixada de ratios, a mellora da atención á diversidade, a actualización de catálogos en centros de infantil e primaria, e a recuperación de dereitos docentes.

Cinco folgas no primeiro trimestre revelan unha situación insostible nas aulas

A secretaria de Acción Sindical do STEG, Comba Campoy, recordou que desde o inicio do curso se sucederon distintas mobilizacións para reclamar a “recuperación” de dereitos. CIG-Ensino e STEG convocaron cinco xornadas de folga no primeiro trimestre —o 25 de setembro, o 28 e 29 de outubro, e o 16 e 17 de decembro—, estas últimas acompañadas de manifestacións en varios puntos de Galiza. A iso sumáronse “encerros” de profesores en diferentes centros para mostrar o “evidente descontento respecto ás condicións dos centros públicos”.

“Ata o momento, nas cinco convocatorias que fixemos durante o anterior trimestre, nunca foi convocado o Comité de folga ou os comités de folga. Seguiremos insistindo a ver se dunha vez por todas, agora que a voz do profesorado está a berrar aínda máis forte, se escoita en San Caetano, que parece que o teñen moi insonorizado”, concluíu Campoy.

Asembleas Abertas do Ensino Público

Ante esta situación, docentes de distintos centros constituíron as Asembleas Abertas do Ensino Público, un “dobre espazo de traballo” que abarca tanto o ámbito local, “para vehicular as denuncias sobre problemáticas concretas de cada centro”, como o asociativo, “buscando a unidade e mobilización de todo o profesorado”. A docente Ana Cabanelas subliñou que este colectivo “non aspira a suplantar o papel das organizacións sindicais, senón a vertebrar mobilizacións do profesorado e a tecer rede”. Nos últimos meses constituíronse asembleas nun centenar de centros de distintas etapas educativas.

A Xunta publica os servizos mínimos

A Xunta estableceu os servizos mínimos para a folga de profesorado convocada por CIG e STEG para este martes, publicándoos no DOG. Estes garantirán a apertura e peche dos centros públicos, así como a seguridade e custodia dos alumnos menores no seu horario habitual.

A folga, á que tamén se suma o Sindicato de Estudantes, afectará ao persoal docente da Consellería de Educación e estendearse durante todo o día 28. A Consellería subliña a necesidade de equilibrar o dereito á folga coa protección dos menores, garantindo as funcións de vixilancia como parte do dereito á educación.

Para cumprir estes servizos, será obrigatoria a presenza do director ou dun membro do equipo directivo en cada centro, aínda que nos que teñan menos de seis unidades poderá ser substituído por un docente. A designación de quen cubrirá estes servizos corresponde á dirección de cada centro e deberá publicarse no taboleiro de anuncios. O incumprimento destas obrigas será sancionado segundo a normativa vixente.