Feminismos
Decenas de miles de feministas saen ás rúas de toda Galiza contra o medo e o auxe do fascismo

O 8M deixou en Galiza unha xornada de mobilización feminista masiva e unitaria, cunha participación que se estendeu desde as sete cidades até decenas de vilas e concellos. Baixo o lema ‘Feminismo é revolución’, a Marcha Mundial das Mulleres protagonizou unhas protestas nas que se esixiron vidas dignas, pobos libres e territorio vivo.

A unidade foi unha das notas características desta convocatoria. A Plataforma Feminista Galega sumouse ás marchas da Marcha Mundial das Mulleres, rompendo cunha dinámica de división que marcara os últimos anos. Nas principais cidades, as concentracións reuniron a milleiros de persoas: desde o Obelisco na Coruña e a Praza dos Cabalos en Vigo até a Praza 8 de Marzo en Santiago, onde a marcha nocturna contou coa presenza da portavoz nacional do BNG, Ana Pontón. En Lugo, Ourense e Ferrol tamén houbo mobilizacións multitudinarias ao longo do día.

Máis aló das cidades, o feminismo galego desbordou cara a localidades como Ribadeo, Vilagarcía, Cangas, Lalín ou Ribadavia, entre outras moitas.

Os manifestos lidos nas distintas cidades poñían o acento en tres grandes eixes: a denuncia do avance da ultradereita en Europa e no mundo, a defensa do territorio fronte a proxectos como os macroeólicos ou a minería agresiva, e a loita contra a precariedade laboral e a sobrecarga dos coidados que recae de xeito desproporcionado sobre as mulleres.