Gira zapatista
Montaña á vista: a delegación zapatista agarda preto de Baiona para o desembarco

Todas esperabamos a chegada dos representantes do Ejército Zapatista de Liberación Nacional (EZLN) para esta fin de semana. Confiabamos nos comunicados oficiais aínda que o temporal nos fixese dubidar. A data de chegada estaba marcada para o domingo 20 de xuño. Os colectivos e medios independentes de todas partes de Europa arribaran á cidade de Vigo con varios días de anticipación.

A tarde do sábado, un comunicado asinado polo subcomantante Galeano, por unha banda  confirmaba a chegada do barco para o domingo 20 de xuño, mais tamén clarificaba que o Escuadrón 421 faría unha proba PCR antes de desembarcar nas costas galegas e que, polo tanto, habería que esperar polo menos 24 horas polos resultados para que os tripulantes puidesen pisar terra. 

Aínda con ánimos caídos polo tempo de espera non previsto, pola mañá do domingo, delegacións provenientes de Suíza, Alemaña, Francia, Suecia, Italia, Portugal, Grecia, Marrocos, Brasil, Suecia, Colombia, Irán, República Checa e de toda a península, concentráronse e camiñaron xuntes desde a Praza do Berbés até o Porto de Transporte da Ría.  

Pola tarde, no Centro Cultural, agora renomeado Caracol Zapatista As Pedriñas, levouse a cabo unha asemblea para terminar de arranxar data e hora do acto de benvida. Entre as participantes atopábase en primeira fila Luz Fandiño, quen tomou a palabra para compartir a súa emoción pola chegada da Montaña e do encontro de forzas internacionais: “Sempre estará alí a nosa resistencia, a nosa loita. Non podemos negala”, dixo ós oíntes.

Sobre as catro da tarde, embarcacións que saíran ó mar con esperanzas de avistar e acompañar á Montaña na súa entrada á ría de Vigo comunicaron que o Escuadrón 421 chegara e mantíñase a flote cerca da costa de Baiona. Ó pouco tempo da esperada arribada, oficiais da Garda Civil abordaron La Montaña e fixeron unha revisión de documentos de viaxe, que se levou a cabo sen problema ningún.

Desde terra, os colectivos despregaron unha manta xigantes na que se lía “Resistencia”, dirixida ás tripulantes mexicanas. A iso seguiu un intercambio de berros de alegría e canto. 

O desembarco do Escuadrón e o acto de benvida será o próximo martes 22 ás 17:00 na praia de Carril (Alcabre). 

“El cielo europeo llora conmovido.  Sus lágrimas se confunden con las que humedecen las mejillas –curtidas a sol, mar, angustias y adrenalina-, del intrépido Escuadrón 421.  En sus pasos, en sus miradas, en sus latidos, los pueblos mayas -así dirá la leyenda-, cruzaron el Atlántico en 50 días con sus noches, en su larga y accidentada travesía por la vida.

 Afuera hace frío, pero dentro, en la geografía del corazón, algo como un sentimiento entibia el alma.  En las montañas del sureste mexicano el sol sonríe y, del equipo de sonido, salen alegres las primeras notas de una cumbia.
Claro, falta el desembarco, el traslado de la delegación aérea, la organización de la agenda, los encuentros,… y la fiesta de la palabra. Es decir, falta todo”, escribiu no seu último comunicado até o momento o subcomandante Galeano desde a serra chiapaneca.