Inditex
Amancio Ortega cobrará 3.234 millóns de euros en dividendos de Inditex este ano

Amancio Ortega ingresará este ano un total de 3.234 millóns de euros en dividendos de Inditex. O fundador e primeiro accionista da multinacional galega cobrará este luns, 2 de novembro, 1.617 millóns de euros correspondentes ao segundo pagamento da retribución que a compañía abona aos seus accionistas.

A cifra supera os 3.104 millóns de euros que Ortega percibiu o ano pasado por este mesmo concepto. Inditex distribuirá durante este exercicio máis de 5.454 millóns de euros entre os seus accionistas, tras incrementar un 4,1 % o dividendo, ata acadar os 1,75 euros por acción.

A retribución divídese en dous pagamentos iguais de 0,875 euros por acción. O primeiro, correspondente ao dividendo ordinario, aboouse o pasado 4 de maio. O segundo faise efectivo este luns e inclúe 0,325 euros de dividendo ordinario e outros 0,550 euros de dividendo extraordinario.

Ortega recibirá os 1.617 millóns de euros a través das súas sociedades Pontegadea Inversiones e Partler, mediante as que controla o 59,294 % de Inditex. A súa participación equivale a un paquete de 1.848 millóns de accións.

A especulación inmobiliaria dos dividendos de Inditex

Unha parte dos dividendos que recibe do grupo téxtil destínase aos investimentos inmobiliarios de Ortega. O empresario é propietario da maior inmobiliaria española, centrada na adquisición e xestión de grandes edificios.

A súa carteira está integrada fundamentalmente por inmobles de oficinas e outros edificios non residenciais situados no centro de grandes cidades de España, Reino Unido, Estados Unidos e Asia.

Pola súa banda, Sandra Ortega, filla do fundador de Inditex, recibirá este ano máis de 275 millóns de euros en dividendos. A súa participación na compañía ascende ao 5,053 %, equivalente a 157,48 millóns de accións. A cantidade supera os 264 millóns que percibiu o ano pasado.