O Salto medra contigo
Atopa alternativas para un planeta en disputa con tres libros de Ecoar e 13 Editora

A actualidade no contexto global está atravesada por crises encadeadas, escaladas permanentes de tensión e xenocidio. Trátase de síntomas dun sistema que prioriza o privilexio duns poucos fronte aos dereitos, a dignidade e o ben común. O que está en xogo neste taboleiro é non só o control dos recursos e a soberanía do territorio, senón tamén o equilibrio ecolóxico e mesmo as condicións que fan posible a vida.

O gasto militar increméntase a un ritmo alarmantemente elevado da man da concentración de poder e un aumento dos movementos represivos e de extrema dereita. Os intereses económicos e xeopolíticos seguen a marcar a folla de ruta dun modelo insostíbel que vén promovido por axendas mediáticas propias. Mentres, os organismos supranacionais amosan evidentes eivas á hora de regular ou limitar este panorama e levar a cabo compromisos efectivos, e as democracias vense cada vez máis deterioradas.

Resulta pertinente preguntarse, ante esta imaxe, cal ha de ser o rol que tomen as cidadanías de cara a artellar respostas efectivas; como impactar sobre esta realidade e como ampliar as marxes de actuación para activar, empoderar e mobilizarnos dende abaixo, non só como dereito, senón tamén como deber.

É por iso que Ecoar organiza as xornadas Planeta en disputa en Vigo entre o 18 e o 21 de marzo de 2026, achegando olladas diversas mediante a realización de distintas palestras para analizar a presente situación xeopolítica e as dinámicas de poder e contrapoder que nela operan. Dende 13 Editora, a súa pata editorial, tiveron a ben sortear tres libros entre as socias e socias de O Salto. 

O sorteo é un exemplar de cada un destes tres libros Alternativas ao poder corporativo, As múltiples caras de Anonymous e Desobedecer, pequeno manual. É dicir, haberá tres persoas gañadoras.

Condicións do sorteo

• Escríbenos a osalto.galiza@elsaltodiario.com co asunto “Sorteo PLANETA EN DISPUTA” indicando no corpo da mensaxe o teu nome e apelidos, teléfono e o enderezo de correo electrónico que tes asociado á túa subscrición.
• Participa entre o luns 16 e o domingo 21 de marzo ás 23:00 horas, ao día seguinte faremos o sorteo e avisaremos directamente por correo electrónico ás gañadoras.