Palestina
Fayez Badawi: “A resistencia non deixará só ao pobo no matadoiro apoiado por Occidente”

Fayez Badawi naceu nunha terra que non era a súa. Na primeira Nakba expulsaron á súa familia, así que tivo que pasar a infancia nun campo de refuxiados preto de Beirut. Aos doce anos viu a cabeza do seu pai batendo contra o chan baixo o pé dun soldado. Ese día, aínda que se cadra foi antes, comezou a militar. Despois pasou por moitas loitas ata que foi voceiro en Europa do FPLP (Frente para a Liberación de Palestina), unha organización laica e marxista-leninista que é parte da OLP (Organización para a Liberación Palestina).

Agora ten uns setenta anos e a súa militancia consiste en explicar como é a resistencia do seu pobo ante a barbarie sionista e capitalista. “Denantes mortos que escravos... Castelao referíase aos palestinos”, di en galego e con retranca antes de comezar a conversa.

Nos medios occidentais, lonxe de falar de xenocidio, fálase dunha “guerra de Israel e Hamás”. Estás dacordo co de “guerra” e de que é con Hamás?
Non. Nós non temos un exército, e o que que hai hoxe é un xenocidio, un exterminio. As crianzas que están asasinando non son de Hamás. Están destruíndo escolas, mesquitas e igrexas. Nas últimas declaracións do ministro de defensa israelí -nazi e terrorista- dicía que os palestinos van quedar sen electricidade, auga, comida, medicinas... Que morran como animais.

A Autoridade Nacional Palestina fala de resistencia pacífica, pero que resistencia? Cando entren os tanques a Gaza dicirlles 'por favor, marchade'? Pois non! Hai que enfrontarse a iso porque estamos morrendo a diario. Temos dereito a resistir de todas as maneiras.

E Hamás é unha organización recente e a loita do pobo palestino non comezou con Hamás. En primeiro lugar hai que deixar claro que cando un pobo vive baixo a ocupación ten dereito á resistencia en todas as súas formas. Esa é a lei internacional en defensa dos pobos oprimidos e expulsados da súa terra. De 1948 a 1956 non houbo resistencia en Palestina, e o dereito internacional non fixo nada, polo que xurdiu a Organización pola Liberación de Palestina, onde están englobadas dentro 13 organizacións palestinas [Hamás está fóra da OLP]. Hamás xurdiu despois do engano da comunidade internacional, coa Conferencia de Madrid en 1991, os acordos de Oslo e a creación da Autoridade Nacional Palestina (ANP). Dixeron que a paz ía chegar a Palestina e nós dixemos que iso era imposible sen expulsar aos colonos e a maquinaria de armas de Israel. En Cisxordania, antes deste engano había 200 mil colonos. Hoxe hai un millón e unha sociedade militar, non civil. Están armados. Rusos, ucraínos, alemáns, españois, franceses, ingleses, norteamericanos, arxentinos... É unha internacional, unha internacional fascista.

Ti confrontas politicamente con Hamas, pero defendes a unidade da loita e da resistencia.
Somos un pobo maduro, democrático e temos que estar todos unidos. Eles teñen unha ideoloxía, eu teño outra. Temos estudos. A quen non coñece a historia ou condena o terrorismo de Hamás, eu dígolle que estude historia, que lea. Somos moitas organizacións en Palestina con diferentes ideoloxías. Somos un pobo normal como todos os pobos do mundo, con xente cristiá, musulmá, xudía, atea... Pero esa canción sempre “Hamás, Hamás...”, quen caia niso, ou é cómplice ou non coñece a historia.

Hamás ten dereito a defender ao seu pobo. Gañaron as últimas eleccións democraticamente e ten dereito a gobernar, pero Occidente levantouse en tromba. É dicir, cando vós escolledes á extrema dereita é democracia, pero cando o meu pobo escolle a Hamás, non. Por que? Os gobernos europeos queren darnos leccións cando son responsables das catástrofes no mundo! Quen rouba a África? Quen fixo as guerras? Hai moitas barbaridades en nome da democracia e a liberdade. Pero prohiben as manifestacións a favor de Palestina. Iso é liberdade democrática?

A ONU hoxe non funciona polo veto norteamericano, e é EEUU quen dirixe o xenocidio contra o pobo palestino.

Explícanos porque cres que a resistencia armada é unha posición respectable, e ata onde cres que son útiles a resistencia pacífica e o dereito internacional, despois de todas estas décadas de apartheid e de resolucións inútiles da ONU.
A Autoridade Nacional Palestina fala de resistencia pacífica, pero que resistencia? Cando entren os tanques a Gaza dicirlles “por favor, marchade”? Pois non! Non, non, non! Hai que enfrontarse a iso porque estamos morrendo a diario. A miña familia, a familia do outro, todo o meu pobo. Temos dereito a resistir de todas as maneiras. Nós nunca fixemos a guerra; fixérona outros. Con que dereito veñen colonos desde Europa quitarnos a terra? Que dereito ten esta xente para expulsar á miña familia? Para troceala? Familiares meus foron a Líbano, Siria, Xordania, outros quedaron e son machacados. Na ‘terra do 48’, porque eu nunca digo ‘o estado de Israel’, asasinaron a 198 palestinos, o que chaman árabes-israelís. Por iso, a resistencia é... A ver, falemos da resistencia no Vietnam. Os vietanamitas deixáronse machacar? E en Alxeria? Estamos orgullosos do pobo alxeriano, porque despois de 132 anos de colonialismo francés, puideron expulsalos. Nós estamos na metade do camiño e imos seguir cara a adiante. Mahmud Darwish dicía: “Probaron todo tipo de armas contra nós. Pero o incrible é que non morremos”. E non podemos morrer. Non poden acabar cun pobo, e eles só son un estado fabricado.

Nos últimos días o secretario xeral da ONU mencionou a ocupación. Cres que as imaxes do exterminio están danando a imaxe de Israel ou non hai nada que facer por esa vía?
A ONU hoxe non funciona polo veto norteamericano, e é EEUU quen dirixe o xenocidio contra o pobo palestino. Mira a declaración con Gran Bretaña, Francia, Alemaña e Italia. A todos eses países, á Unión Europea e a Von der Leyen hai levalos aos tribunais internacionais. Tanto falar de Ucraína e aquí non saen a favor do pobo palestino. Dígocho claramente: non me fío da ONU como non me fiaba do cuarteto das Azores apoiando a masacre contra Iraq. Había armas de destrución masiva? Hoxe Israel é unha base militar do imperialismo, do capitalismo, do seu brazo armado que é a OTAN.

Desde occidente custa entender o contexto da resistencia armada palestina. Os medios falan unha e outra vez dos “terroristas”. Por que non temos esa empatía ou esa capacidade de entender o que pasa?
Chomsky, de orixe xudía, dicía: “Os medios de comunicación amosan unha cara anxelical do capitalismo.” Pois ese capitalismo é o que nos machaca. A maioría da información que chega. Se digo unha frase, terxivérsana, pasoume moitísimas veces. Interesa culpar ao máis débil, á vítima, apoiar ao verdugo, en gran medida polos intereses económicos na zona. Nós diferenciamos entre medios de comunicación e xornalistas. Os xornalistas que din o que ven son asasinados. En Gaza, 22 ata onte. Por outra parte, que alguén me diga a que país levou a paz EEUU. Agora están no norte de Siria roubando o gas e o petróleo. Apoiaron máis de 36 ditaduras en América do Sur e Central. Iso é EEUU, o Imperio. Os bárbaros son eles. Agora din que hai reféns. Non. A resistencia capturounos e son presos, pero el non se preocupa polos presos palestinos, que hai 7000 nos cárceres.

Ten Estados Unidos o control total sobre o relato da Unión Europea?
Si, están todos xuntos. Por iso se fixo a declaración dos cinco, encabezada pola señora Von der Leyen. Estamos nun mundo unipolar que agardemos que cambie. Nun mundo multipolar, a cousa cambiaría, para nós e para todos os pobos do mundo.

Ocupación, relato y compol de Israel en La Catana

Paula Pof

2

El Salto Twitch

El Salto Twitch Ocupación, relato y compol de Israel en La Catana

Paula Pof

2

El jueves 26 de octubre a las 21h La Catana en directo en twitch y youtube con especialistas en comunicación con Mussa'ab Bashir, Olga Rodríguez y Manu Levin.

Como de lonxe cres que está ese cambio? Poden afectar dalgún xeito as imaxes tan duras do exterminio?
Non temos ningunha esperanza nos gobernos dos países da UE. Temos confianza nos seus pobos, que saíron en tromba a favor de Palestina. Pero se os gobernantes da UE non respectan as súas poboacións, como nos van respectar a nós? Agardamos que os pobos rompan as relacións comerciais con Israel, e mesmo as chamadas relacións académicas, entre universidades. Que pinta Israel en Eurovisión? Ou na Eurocopa? Agradezo ver as bandeiras palestinas enchendo Riazor. Iso si é apoio ao pobo palestino e iso é o que non queren. Se hai cambio, farano os pobos.

E a loita dos pobos pode forzar o cambio nas posturas dos gobernos?
Iso depende dos pobos da UE. Nós temos que seguir cara a adiante, morrer e resistir. Existimos porque resistimos como pobo.

O pobo palestino adoita presentarse nos medios dunha maneira moi simple. Por unha banda, malvados terroristas; e por outra, unha sociedade civil representada normalmente por mulleres e nenos que non están politizados e que só queren ser seguir coas súas vidas, como se vivir en apartheid e ocupación non fixese inevitable esa politización e esa loita colectiva. É algo que se percibe moi rapidamente cando estás en Cisxordania. Como de colectiva e complexa é esa resistencia?
É o pobo mesmo quen esixe esa resistencia. Hai un campo en Gaza, Jabalia, que está machacado, e houbo hai pouco unha manifestación pedindo máis resistencia. Lembro casos no Líbano, na batalla de Beirut, no 82. Vin a avoas, con 84 anos, facendo comida e levándoa a primeira liña. Arriscando a súa vida para levar comida aos fillos. Dicíanlle: “O teu fillo non está neste posto.” E ela: “Aquí todos son os meus fillos.” E a outro posto levará comida outra nai, outra avoa. Unha resistencia non existe sen apoio popular. É a necesidade dun pobo. Unha necesidade.

Van entrar os tanques? Que entren, alí está a resistencia preparada. O eixo da resistencia non vai deixar ao pobo palestino só no matadoiro.

O ano pasado falabamos cun sindicalista, precisamente de Jabalia -que por certo, bombardearon a súa casa a semana pasada- e dicía que “por cada palestino que asasinen, nacerán catro ou cinco”. Como de literal é isto?
[Fayez sorrí con orgullo] Iso nace. Pola represión que estamos a sufrir, polos asasinatos, por todo, é que nos incorporamos á loita. Eu con 12 anos, sen que o souberan os meus pais. Vin á policía golpeando ao meu pai, pisándolle a cabeza. El non puido defenderse porque tiña criaturas que manter. Entón o fillo incorpórase á loita sen que o saiba o pai. Eu vin a Europa pero sigo coa miña causa. Vivo ben, aínda que ultimamente non moito polo que pasa na miña terra. Sempre temos o corazón alí. Chega un momento que nos dá igual todo, porque nos están exterminando. O que esiximos agora mesmo que entre comida a Gaza, que entren medicamentos, combustible... O que entrou agora é como unha pinga de auga nun océano. Pero non é que criemos aos fillos para resistir. Non. Iso nace dun pobo. A resistencia é do pobo. E se non hai resistencia, non hai pobo. Se non hai pobo, non hai resistencia.

“Precisamos que o mundo saiba que clase de país é Israel”

Pablo Santiago

Palestina

Fayez Elemare “Precisamos que o mundo saiba que clase de país é Israel”

Pablo Santiago

O dirixente da Unión Independente de Comités Obreiros Palestinos destaca que a pandemia e a guerra en Ucraína complicaron aínda máis as condicións da clase traballadora en Gaza, ao tempo que critica o esquecemento dos gobernos e medios occidentais.

Que cres que pode pasar nas próximas semanas?
Hai un plan infernal para eliminar Gaza de persoas. Eliminalos ou expulsalos para ter o seu Israel. Os de Gaza ao deserto do Sinaí e os de Cisxordania a Xordania. Pero o plan vai fracasar. Israel fixo a primeira trampa: “Que vaian ao sur e Gaza, que estarán en paz”. E non foi certo. Entón, á xente non lle queda outra. Van entrar os tanques? Que entren, alí está a resistencia preparada. E se non podemos, estará a resistencia por todo o mundo árabe. O eixo da resistencia non vai deixar ao pobo palestino só no matadoiro. O matadoiro apoiado por Occidente. Macrón, Sunak e Schultz; especialmente eses tres están apoiando a masacre. Esa é a responsabilidade deste mundo, do ‘mundo libre’. Nós non dicimos ‘comunidade internacional’, dicimos “a chamada comunidade internacional”. Se hai unha comunidade internacional, Israel non se atreve a meter ningún tanque.Hai cousas que non se poden entender neste mundo. Pero eu volvo a dicir, eu entendo só a resistencia en todas as súas formas. Iso é o que ten que facer o meu pobo.

Leo un chío: “ Os palestinos non están rogando a ninguén que recoñeza a nosa humanidade. É a humanidade do mundo a que estamos cuestionando”.
É a realidade. Como dixen antes, as vítimas temos que demostrar sempre que somos vítimas. Se non ven o que pasa en Palestina é porque non queren. Son cómplices. Pero claro, o que axuda con isto sempre é o poder mediático, os medios de comunicación. Claro que o chamado ‘mundo libre’ é responsable. Nós somos humanos, pero occidente... Todas as guerras do mundo fabricounas Occidente.

Algo do que non falaramos e queiras engadir?
Agradecemos a todos os pobo do mundo a súa solidariedade co noso pobo. A única solución é un Estado palestino, laico, democrático, do Río Xordán ao Mediterráneo cuxa capital é Xerusalén. Calquera que queira integrarse na nosa sociedade e ser antisionista é benvida. Palestina prometemos que será libre, porque se resistes, existes. Imos seguir defendendo ao noso pobo, e imos seguir cara a adiante. Palestina vencerá.