Política
A Anova de Beiras e Martiño Noriega volve pedir o “voto utilitario antifascista” para o BNG

Anova-Irmandade Nacionalista, o partido de Xosé Manuel Beiras e Martiño Noriega, lanzou un “chamamento urxente” a defender a democracia ante unhas eleccións xerais, as do vindeiro 29 de novembro, nas que están en risco as conquistas en materia de dereitos das últimas décadas. A formación pide á cidadanía galega un “voto utilitario antifascista” e reclama o apoio á candidatura soberanista do BNG.

Nun comunicado, a organización sostén que os partidos políticos teñen a obriga de entenderse e proxectarse na sociedade como ferramentas ao servizo das maiorías sociais, “nunca como un fin en si mesmo”. Anova, que se define como espazo soberanista e republicano, asegura facer feito desta máxima a súa praxe política dende a súa fundación, inspirada no exemplo de Xosé Manuel Beiras, a quen chaman “irmán”.

A formación lembra que nos anos dez impulsou espazos transformadores de unidade popular entre distintas sensibilidades da esquerda galega e que, nestes “convulsos anos vinte”, optou por alimentar os vasos comunicantes cos movementos sociais, manter o seu traballo nas candidaturas municipalistas e amosar o seu apoio ao cinto soberanista das nacións do Estado. Ese cinto, afirma, foi nos últimos tempos a voz das maiorías sociais nas institucións e un antídoto contra as extremas dereitas, e represéntano espazos como EH Bildu, ERC, a CUP e, en Galiza, o BNG. Segundo Anova, isto explica algunhas das súas posicións alén dos “minorados marcos partidarios” e das “tácticas cativas”.

“Ninguén pode quedar na casa cando a propia casa de todas está en perigo”, reclaman dende Anova

O comunicado fala dun “momento de emerxencia” no que moito do construído durante anos “pode esvaecerse en meses”, a pesar do compromiso dunha cidadanía activa coa defensa do feminismo, a lingua galega, os servizos públicos, o dereito á vivenda e unha transición ecolóxica xusta. Anova considera necesario acompañar esa resposta colectiva ante quen deshumaniza o outro e cuestiona os consensos máis básicos, e que, denuncia, están dispostos a empregar todos os medios para reprimir a quen non acate o seu mandato.

A organización defende que as prazas e as rúas “volven marcar o camiño”: organización, programa de ruptura, folga xeral e combate cívico en todos os espazos nos que a extrema dereita pretenda normalizar “a barbarie”. Nese contexto, aboga por apostar pola diversidade e tecer alianzas sociais e políticas na defensa de “pan, traballo e teito”, sen esquecer que os espazos nos que non se exerce poden ser ocupados pola “negra sombra da longa noite de pedra”.

Por todo isto, Anova fai un chamamento á participación da cidadanía galega cun voto utilitario antifascista nas xerais do 29 de novembro e pide o respaldo en Galiza á candidatura soberanista do BNG. O comunicado remata cunha consigna: “Ninguén pode quedar na casa cando a propia casa de todas está en perigo”.