Derecho a la vivienda
Galiza comeza unha semana histórica de mobilizacións e asembleas abertas pola vivenda

Os sindicatos de vivenda de todo o país traballan arreo arestora para canalizar e organizar a raiba logo do estoupido social que está a producir o desafiuzamento de Maricarmen Abascal, unha muller de 87 anos que foi desaloxada a pasada semana da súa vivenda de Madrid na que residía desde había sete décadas. O seu caso converteuse en símbolo estatal da crise da vivenda e os sindicatos galegos están a transformar a indignación nun calendario de protestas e asembleas de organización.

Vigo foi das primeiras cidades en reaccionar. O Sindicato de Inquilinas convocou de urxencia unha concentración nos peiraos de Beiramar, fronte ao Auditorio Mar de Vigo, coa idea de que ninguén debería perder a súa casa para que outros fagan negocio. Este luns, a Alianza pola Vivenda Vigo, na que participan, entre outras moitas organizacións, o Sindicato de Inquilinas e o Foro Socioeducativo As Ninguéns, convocou unha nova concentració co lema “Nin unha Maricarmen máis” ás 19.30h na Porta do Sol en Vigo. Ademais, chaman a participar no Obradoiro de autodefensa inquilina deste sábado 3, ás 11.30h na Revolta.

En Santiago, o Sindicato de Vivenda de Compostela citou a cidadanía ás 20h na Alameda nun formato de concentración e cea colectiva que rematará cunha foliada: cada quen levará a súa comida para compartila e protestar contra rendistas e multipropietarios. Mañá, martes 29, ás 19h, convocan no palco da propia Alameda, unha asemblea aberta.

Na Coruña, a protesta xa se celebrara o domingo mais este luns volven á rúa, organizadas polo Sindicato de Barrio da Falperra / Os Mallos, cunha concentración ás 20h diante do Obelisco. As concentracións, obradoiros e asembleas abertas a toda a veciñanza, buscan converter o malestar en organización sostida.