Xunta de Galicia
O TSXG aparta o xuíz Villares da sala que xulga os eólicos tras ser sinalado pola patronal e a Xunta

Tras anos de sinalamentos de suposta parcialidade por parte do Goberno galego e de altos cargos do PP na Galiza, hoxe a Xunta está de celebración: os maxistrados Luís Villares e Dolores López foron trasladados á forza dos seus postos pola nova presidenta da Sala do Contencioso-Administrativo do Tribunal Superior de Xustiza da Galiza, María Azucena Recio, apenas unha semana despois de chegar ao cargo.

A Sección Terceira da Sala, encargada de xulgar litixios en torno a varios contratos da Xunta da Galiza como a causa do IBI do Hospital Álvaro Cunqueiro ou as tramitacións ambientais de polígonos eólicos nos montes galegos, queda, con esta manobra, sen os seus principais contrapuntos á lexislación da maioría absoluta do Partido Popular no Goberno galego.

O PP foi atacando a Villares en cada unha das súas resolucións xudiciais contrarias aos seus intereses. Con cada paralización cautelar dun parque eólico, a xustificación, para o Goberno galego, sempre foi política e nunca xurídica, sinalando a súa militancia e portavocía durante os anos doces da esquerda federal con En Marea.

A reorganización da Sección Terceira da Sala do Contencioso-Administrativo do Tribunal Superior de Xustiza da Galiza desatou unha forte polémica tras unha serie de decisións adoptadas pola nova presidencia apenas días despois de asumir o cargo o pasado 6 de marzo de 2026.

Segundo un comunicado difundido pola Sección Territorial de Xuízas e Xuíces para a Democracia, unha das primeiras medidas da nova presidenta foi o “desmantelamento da actual Sección 3ª”, encargada de asuntos clave como as autorizacións de parques eólicos e grandes contratos públicos.

O colectivo xudicial cuestiona a base destas decisións, sinalando que “non consta que a Sala de goberno do TSX da Galiza aprobara ata o día de hoxe criterios como os aducidos”. Ademais, critican que os acordos se xustifiquen en motivos xenéricos como “un crecemento profesional e unha oportunidade na carreira profesional” ou “necesidades organizativas”.

A reorganización implica o traslado forzoso de dous dos catro maxistrados da Sección 3ª, unha medida cualificada de inusual: “Queremos chamar a atención do inusual dun traslado forzoso de tanta envergadura como o producido e as formas coas que se realiza”. Tamén denuncian que se adoptou “sen audiencia previa nin consultas informais”.

O comunicado advirte de posibles consecuencias no funcionamento do tribunal, xa que os novos maxistrados “non teñen experiencia previa nesta Sala nas concretas materias que lles son encomendadas”, o que podería xerar “unha evidente disfuncionalidade”.

Nun contexto de presión pública sobre esta sección polas súas resolucións, especialmente en materia eólica, o colectivo considera que a situación pode afectar á confianza cidadá: “Non é descartable que a cidadanía poida pensar que as reiteradas presións políticas e empresariais finalmente conseguiron o resultado perseguido”.

Así mesmo, alertan do impacto na independencia xudicial: “A imaxe do Tribunal e da súa independencia quedan moi afectadas” e o traslado “pode poñer en risco a garantía de inamovibilidade xudicial”.

Finalmente, a asociación expresa a súa inquietude e pide prudencia institucional: “Queremos mostrar a nosa preocupación polo risco de afectación ás garantías constitucionais de inamovibilidade e independencia”, ao tempo que trasladan “o noso apoio aos maxistrados/as” da sección afectada.