Xunta de Galicia
A Xunta avanza no seu “plan de vivenda”: mercar baixos comerciais en Ourense e alugalos “a prezos asequibles”

O Goberno galego porá en marcha entre xaneiro e maio de 2026 unha oferta pública de adquisición de locais comerciais e de entreplanta na cidade de Ourense, cunha dotación económica total de dous millóns de euros. O obxectivo da iniciativa é adquirir estes espazos para a súa posterior transformación en “vivendas protexidas” destinadas ao alugueiro.

O conselleiro de Presidencia, Diego Calvo, explicou que “a idea é mercar baixos comerciais ou de entreplanta baleiros e transformalos para uso residencial. Cada local deberá permitir a construción de polo menos unha vivenda e todos os fogares resultantes serán postos en alugueiro a prezos accesibles”.

Calvo presidiu este luns o Consello da Xunta debido á ausencia do titular do Executivo autonómico, Alfonso Rueda, que se atopaba en Madrid participando nunha reunión da xunta directiva do PP. Tras o encontro, o conselleiro compareceu ante os medios acompañado pola responsable de Vivenda, María Martínez Allegue, para detallar o alcance desta oferta pública de compra.

Segundo o avanzado, o prazo para presentar as propostas de venda de locais —que “terán que estar en bo estado e libres de cargas”— abrirase coa publicación da convocatoria no Diario Oficial de Galiza (DOG), prevista para comezos de xaneiro, e prolongarase ata o 1 de maio de 2026.

Pola súa parte, Martínez Allegue sinalou que esta actuación permitirá tamén avanzar na eliminación do “feísmo” urbano. A conselleira xustificou a elección de Ourense como proxecto piloto ao tratarse dun municipio no que “non hai máis solo onde poder construír”.