Altri
A Xustiza condena á Xunta por reducir ilegalmente a protección dos terreos onde quería ubicar a macrocelulosa

O Tribunal Superior de Xustiza de Galiza (TSXG) ordenou á Consellería de Medio Ambiente e Cambio Climático que preserve na súa planificación medioambiental a “protección” duns terreos onde, segundo a acusación, estaba prevista a instalación da planta de Altri en Palas de Rei (Lugo).

A resolución, con data do 13 de febreiro de 2026 e adiantada por Nós Diario, dálle a razón á Asociación para a Defensa Ecolóxica de Galiza (Adega), que denunciou ante os tribunais a supresión por parte da Xunta dunha zona de amortecemento vinculada á Serra do Careón, espazo integrado na Rede Natura 2000.

O fallo —recorrible en casación, opción que a Consellería aínda estuda— diríxese contra unha modificación introducida polo departamento autonómico na súa Estratexia galega de infraestrutura verde e conectividade e restauración ecolóxicas entre a fase de consulta pública e a orde publicada no Diario Oficial de Galiza o 10 de febreiro de 2025. As zonas de amortecemento son, segundo lembra o tribunal, áreas que exercen de colchón entre a paisaxe xeral e os corredores ecolóxicos e espazos protexidos, dentro de hábitats prioritarios e de refuxio para especies catalogadas como ameazadas.

O TSXG conclúe que a eliminación de devandita zona requiría unha “especial motivación” sustentada nun “interese xeral ou público” que, neste caso, “non consta”. A xuízo dos maxistrados, resulta “contradictorio e sumamente estraño sen motivación, por un lado recoñecer a relevancia ambiental dese espazo e que posteriormente tras ter transcorrido o trámite de información pública se modifique dito recoñecemento”. Aínda que a coincidencia deses terreos co emprazamento previsto para Altri non pasa desapercibida, o tribunal subliña que ese feito lle resulta “indiferente” a efectos xurídicos.