Filosofía
Nace o Instituto Clara Corbelhe de Estudos Críticos Galegos

O Espazo Clara Corbelhe deu un paso máis na súa traxectoria coa súa conversión no Instituto Clara Corbelhe de Estudos Críticos Galegos, unha nova entidade que nace co obxectivo de contribuír á consolidación dunha institucionalidade galega propia e de impulsar o debate público arredor da acción política e do pensamento crítico en Galiza.

A transformación foi anunciada este decembro en Santiago de Compostela e responde á vontade de reforzar a capacidade do país para xerar coñecemento propio e crear espazos estables de análise e reflexión desde unha perspectiva galega. Segundo explicaron desde a entidade, o novo instituto aposta por un modelo institucional aínda pouco desenvolvido en Galiza, orientado a articular redes entre o ámbito académico e as militancias sociais e políticas.

O Instituto Clara Corbelhe continuará o labor desenvolvido ata agora polo Espazo Clara Corbelhe e contará cun programa anual de actividades que incluirá xornadas de estudo, publicación de artigos en liña, edición de revistas e libros, así como a posta en marcha de colaboracións con universidades, centros sociais e outras entidades.

Desde o Consello de redacción, órgano de dirección do instituto, sinalan que a nova etapa nace coa misión de articular o pensamento crítico galego, organizar encontros de reflexión colectiva, editar publicacións estratéxicas e abrir canles de colaboración entre o mundo académico e os movementos militantes. O obxectivo, subliñan, é construír un espazo estable e rigoroso, concibido como unha “comunidade de ideas” capaz de contribuír á autonomía intelectual de Galiza.