Galego
Miles de persoas enchen Compostela cun berro único en defensa da lingua galega

A Alameda compostelá acolle desde o mediodía deste domingo o inicio dunha manifestación convocada pola plataforma Queremos Galego baixo o lema “Lingua vital xa!”, unha cita que ten por obxectivo “parar a emerxencia lingüística” que sofre o idioma propio de Galiza e esixir á Xunta “un cambio de actitude”.

A manifestación arrincou ás 12h da Alameda de Santiago cara á praza do Obradoiro co obxectivo de defender unha lingua que se poida utilizar en todos os contextos: “Un dereito que agora mesmo a poboación galega non ten no seu poder”, como explican dende a plataforma de a Mesa pola Normalización Lingüística.

Baixo lemas como “Na Galiza en galego”, “Queremos galego”, “Queremos galego na escola e no traballo” e “A lingua non se vende, aquí está o pobo que a defende”, miles de persoas ateigaron a praza de Santiago de Compostela nunha manifestación que a organización cualificou de “histórica”, coincidindo co 188º aniversario do nacemento de Rosalía de Castro.

O evento, conducido polo artista Xurxo Souto, tivo como peche un concerto de Mondra, ademais das actuacións de Carapaus e da asociación de gaiteiros e gaiteiras galegas, que interpretaron a Alborada para Rosalía.

Desde un dos escenarios instalados na praza, Celia Armas, coordinadora de Queremos Galego, subliñou que “o galego ten futuro porque o pobo ten dignidade”. Ademais, agradeceu a participación de delegacións procedentes de Cataluña, do País Vasco e da Rede Europea polas Linguas, que se sumaron á mobilización en apoio á lingua galega.