Opinión
Gerrari gerra!

XX. mendeko mugimendu antimilitarista gertu zein urrunetik bizi genuenontzat, zaila da ulertzea Ukrainako okupazioaren inguruan garatu diren diskurtsoak. Gerraren aldeko mezuak egoki eta zentzuzkotzat hartuak izaten ari dira, armak bidaltzearen alde agertu direnek era guztietako argudioak erabili dituzte, eta II. Errepublikarekiko paralelismo bortitz eta zehaztasun historikorik gabeak baliatzen ari dira. Hala, gerren eskuetatik datozen gezurrek, fake newsek, etsaiaren deabrukeriak azaltzen dituzte.

XXI. mendean, mugimenduek ez dugu ikusten kontinente mailako artikulaziorik dagoenik. Ez dugu elkarlanik Ukrainako esparru sozialekin, eta zaila da ahots antimilitaristak entzutea; benetako esfortzua egin behar da desertzioa proposatu eta bakearen alde azaltzen direnak entzuteko. Armak hartu eta askotariko jarrerak agertu dituzten anarkisten informazioa besterik ez dugu...

“Ez dugu elkarlanik Ukrainako esparru sozialekin, benetako esfortzua egin behar da ahots antimilitaristak desertzioa proposatu eta bakearen alde azaltzen direnak entzuteko”

Gerra honek kontinente eta mugimendu mailan ditugun mugen aurrean jarri gaitu. Azken hamarkadetan, politikak gero eta gertuago begiratu du, eta orain distantzia motzeko begirada horren ondorioak jasaten ari gara. XIX. mendeko iraultzaileek mundua aldatu nahi izan zuten, eta guk, berriz, auzoa aldatu nahi dugu. Goragoko handinahirik ez izateak elkarlanerako zubiak desegin ditu. Beraz, ezinbestekoa da begirada politikoa altxatu eta gure lurraldetik ateratzea. Ukrainako gerra ez dugu ukraniarrik gabe geldituko, ezta aurrerantzean etorriko direnak ere.