Opinión
Comunicado do Administrador-xerente de Librouro

Estimado Sr. Director do Saltodiario,

O pasado 5 e 7 de agosto de 2020 o seu diario publicou unhas novas que afectan directamente a esta libraría, con datos inexactos e incorrectos, e a súa divulgación está a causarnos múltiples prexuízos.

1. A noticia comeza coa seguinte frase:

“Un xulgado condena en Vigo ao traballador dunha libraría por reclamar o que lle deben”

Afirmación falsa, xa que o Xulgado condenou ao traballador por COACCIÓNS, non por reclamar o que el cre que lle deben.

Na propia Sentencia ditada o xulgador concluíu que o traballador non reclamou nada a esta empresa pola vía laboral (a competente para o exercicio das súas pretensións), e optou por exercer presión e constrinxir a vontade dos donos da libraría Librouro, directamente a traves da vis compulsiva ou violencia psíquica, e indirectamente a través da situación na que colocaba aos clientes ao ver a unha persoa que está a molestar á porta de dito local (en ningún caso se fala de impedir a entrada).

Esta Sentencia foi entregada polo representante de Librouro aos xornalistas que redactaron o artigo, pero non recollen o seu texto, senón que redactan as manifestacións do condenado, novamente dirixidas a coaccionar a esta libraría. Achégase novamente copia de dita Sentencia.

2. O artigo publicado no seu diario continúa a dicir:

“A sentenza actual obrígao a indemnizar con 760 euros a Librouro e 400 en concepto de multa. Acúsano de supostos delitos leves de coaccións e de orixinar perdas económicas por manifestarse diante da porta da empresa mentres esixía os cartos que non lle pagaron. José Iglesias, o traballador condenado por manifestarse diante da libraría Librouro por impagos desta”.

Manifestacións novamente inexactas. Así:

—A sentenza non o “acusa” de “supostos delitos”, senón que o CONDENA pola comisión dun delito leve de coaccións, e declárao civilmente responsable de parte das perdas económicas xeradas á librería, coa coolaboración dun sindicato fronte ao que non se dirixiu a acusación (xa que na data da denuncia o Sr. D. José Iglesias manifestábase só).

—O Sr. D. José Iglesias nunca reclamou a esta empresa salarios impagados, limitándose a pórse cunha pancarta diante da porta da libraría, con manifestacións xenéricas, desacreditando a Librouro.

3. A noticia continúa dicindo que “As mobilizacións foron motivadas tras presións laborais e humillacións a unha empregada”, segundo José Iglesias, texto que se reproduce:

De todos modos, estas mobilizacións foron motivadas tamén por motivos de solidariedade laboral. “Trátase dunha empresa familiar, había outra empregada á que machacaron laboralmente; presionándoa e humillándoa mentres traballaba para contratar á filla da xerente no seu posto”, explica Iglesias. Tras isto, “conseguiron que a antiga traballadora marchase cunha baixa voluntaria ao borde dunha depresión, sen paro nin indemnizacións”. “A partires do acontecido, eu seguía esperando polos cartos que se me prometeran e non se me pagaran, decidín comezar a loitar polo meu”, afirma.

Esta manifestación non é máis que a opinión do Sr. D. José Iglesias, xa que a traballadora cesou voluntariamente en debida forma (única á que pode referirse, polos datos recollidos na súa publicación, que preserva o seu anonimato), mantén boa relación con esta empresa, e nunca nos trasladou os comentarios recollidos no seu diario.

É significativo o feito de que ningún traballador ou traballadora de Librouro secunde as reivindicacións do Sr. José Iglesias.

En todas as súas manifestacións ante a porta da libraría estivo só, ou acompañado de membros do sindicato CGT. En ningún caso, acompañado doutros traballadores de Librouro (actuais ou anteriores).

Entendemos que esta información debería ser contrastada con seriedade e responsabilidade, xa que as actuacións do Sr. D. José Iglesias están a perxudicar seriamente a imaxe de Librouro, libraría insigne da cidade coa conseguinte repercusión económica.

Nas súas manifestacións este traballador da empresa animaba a clientela a mercar en Amazon ou na Casa do Libro. Nestes tempos resulta moi difícil manter aberta ao público unha libraría tradicional e independente, e esta reivindicación carente de fundamente que está a levar a cabo o Sr. D. José Iglesias está causando serios danos a este negocio familiar, e aos seus propios compañeiros de traballo.

Por último, deixar constancia de que:

—Librouro non lle debe cartos ao Sr. D. José Iglesias.

—A “protesta” do traballador comezou porque el manifestou a súa vontade de deixar de traballar en Librouro, pero pretende que se lle pague a indemnización correspondente a un despido improcedente; cando a empresa non tiña intención algunha de proceder ao seu despedimento. A partir dese intre foi cando decidiu manifestarse ante a libraría, para conseguir un fin que a lei non ampara. Por medio de coacción.

Exposto canto antecede, solicito a publicación íntegra desta rectificación, con relevancia semellante á aquela na que se publicou ou difundiu a información que se rectifica, nos termos dispostos na Lei Orgánica 2/1984, de 26 de marzo, reguladora do dereito de rectificación (BOE nº74 de 27/03/1984).

Sen outro particular, aproveito para saudarlle, cordialmente,

Xurxo Patiño Perez,

Administrador-xerente de Librouro

En Vigo, a 11 de agosto de 2020